Chak leh nghal kan tum - Arteta

Arsenal manager Mikel Arteta chuan Liverpool an hneh loh hnuah insiamṭhat nghal an tum tih a sawi a, tun kar tawpa Newcastle United nen an inkhelh turah fimkhur tak chungin hnehna chan theih ngei a beisei.

Gunners hian season bul an ṭan chhe takzet a, mahse, an insiamṭhat hnuah an kaltluang hle. Amaherawhchu, an match hnuhnung bera Reds an hmachhawn ṭumin an mualpho, ngelnghet leh ṭha taka khelh theih chu an zir hmabak tih a takin a lang.

Arteta chuan, "Premier League team ṭha kan neihte hi en ila. Anni lak aṭangin entawn leh zir tur tam tak kan nei, match khat khelh ṭhat hluai ringawt an ni lo, season tluanin ṭha takin an khel. Chumi bakah minute 90 chhung hi an inthlahdah ngai eih lo," a ti.

Tunkar tawpa an hmachhawn tur Newcastle chungchang sawi zuiin Spanish manager chuan, "Tun hmain kan khelmualah Magpies lakah result ṭha kan lo nei tawh ṭhin, mahse khang result kha rin chhunzawm theih a ni lo.

"Tunah chuan match thar khel tur kan ni a, engkim a bul aṭanga tih a ngai. Season kal laiah Newcastle hi a khel ṭha tawk lo a ni mai thei, mahse an match hnuhnung bera Brentford nen an inkhel kha en chuan hma an sawn nasa hle," tiin a sawi.

Premier League team 20 ten match 12 ṭheuh an khel tawh, an zingah Newcastle chiah hi chak ni hmel la hmu ve lo an ni. A neitu lamin sum ngah mah se an la hmang ngawt thei si lo, manager thar atana an ruat pawh Eddie Howe a nih avangin beisei san an harsa rih viau.