Xavi enkawl Barcelona Eng nge an an zel dawn?

Xavi enkawlna hnuaiah Barcelona-in beiseina thar an nei a, coach thar hnuaia an match hmasa berah Espanyol chu 1-0 in an hneh nghal. Champions League-ah 0-0 in Benfica inhnehtawkpui zui mah se an khelh danah fans an lungawi a, Barca khelh dan 'system' dik tak kha hmuh turin a awm leh ta.

Xavi enkawl Barca hian zanin dar 1:30-ah Villarreal an lenchilh dawn a, point 10 zetin hmahruaitu Real Madrid la thlau mah se league match 13 chauh an la khelh avangin nomawi beiseina an nei thar ve leh thei ang.

Hmahruaitu Real chuan Pathianni zan dar 1:30-ah Sevilla an mikhual dawn thung a, team pahnih inkarah hian point hnih lek a awm avangin he inkhel hi a hmuhnawm dawn.

Champion lai Atletico Madrid-in tun hnaiah result an nei ṭha thei lo a, inelna hrang hranga an match hnuhnung pariatah vawi hnih chiah an chak - Champions League aṭanga tla thei dinhmunah an ding mek a, league-ah palina an ni mek bawk. Pathianni zan dar 11:00-a Cadiz an lenchilh hunah chak an mamawh.

Pedri a tel lo
Barca rawlthar duhawm Pedri-a'n season hmasa chhungin club leh ram tan match 71 a khel a, season thar a herchhuah meuh chuan a inkhelh tam luat a tuar lo - hliam vangin a buai deuh reng a, thuthar berah chuan kumin chhung a chawlh tur thu sawi a ni.

Catalan club hian hliam leh thil dang vangin Sergi Roberto, Pedri, Ansu Fati, Sergio Aguero leh Martin Braithwaite an la chhawr thei lo bawk a, chutihrual chuan player inhliam ngun ve tak Ousmane Dembele chu chhawr theihin a awm ve teh mial thung.

Barca hliam neih dan enin Xavi tan a lu hai thlak ang tih a chiang a, mahse, Al Sadd boss hlui hian Memphis Depay, Gavi, Sergio Busquets leh Frenkie de Jong te ho a la neih avangin an beisei danglamna thlen turin chhuanlam neih a thiang lo.

Villarreal-in an ṭhat dan berin Barca an hmachhawn thei dawn bik lo a, an thiampuipa Gerard Moreno chu hliam vangin a inlan theih a beiseiawm chiah lo - kum 19 mi Yeremi Pino erawh a dam ṭha a, Spain international winger hi zaninah lo en bik rawh.

Real beiseina
Espanyol lakah rin loh taka an tlawm hnuin Real an insiamṭha a, inelna hrang hrangah match riat khelin tlawm an nei leh tawh lo - heng zinga vawi sarihah hian an chak a, vawi khat an khingpui an inhnehtawkpui.

Carlo Ancelotti enkawlna hnuaiah Real player-ten hma an sawn a, Vinicius Junior chu hmasawn langsar zinga mi a ni. Brazilian forward hian tun season inelna hrang hrangah match 18 khelin goal 10 a khung a, assist vawi sarih a nei - a career-a season khata goal a khung hnem ber record chu a nih rual der tawh.

Karim Benzema lam hmaih a thiang lo - khelmual pawnah chanchin lawmawm lo nei ṭhin mah se khelmuala a chanchin erawh amah neitu club tan chuan a lawmawm lam hlir a ni a, tun season-ah match 17 aṭanga goal 15 khung tawhin a team tan a thawhhlawk hle.

Hetihrual hian an hmachhawn tur Sevilla hi beisei phak baka season hmang ṭha an ni a, Julen Lopetegui enkawl team hian Real an hneh chuan La Liga hmahruaitu an ni thei dawn - hei hi rilrua vawng ran chungin Santiago Bernabeu an pan ang.