Khalid Jamil-a naute chak thei lo

NorthEast United-in season hmasa ISL-a semifinal luhpuitu Khalid Jamil chu beiseina sang tak nen coach nghet atan lalut mah se Aizawl FC boss hlui hian an beisei ang result a la pe thei lo a, Ningani zan khan Kerala Blasters nen 0-0 in an inhnehtawk.

Highlander tan Lalkhaw-puimawia (Mapuia) leh Laldanmawia Ralte ten inkhel bul ṭan mah se Mizo tlangval pahnihin beisei an phak lo a, hmun chan chhunzawm zel an duh chuan insiamṭhat an mamawh.

Minute 90 pelh tawh hnuah Rochharzela luhtir a ni a, Aizawl FC forward hlui tan danglamna thlen turin hun a tam tawk lo. Blasters lamah K. Lalṭhathanga'n bul ṭan lo mah se minute 60-naah luhtir a ni a, Bethlehem Vengthlang tlangval hian goal a keng tel bik lo.

NorthEast United tan goal-keeper Subhasish Roy Choudhary chu fak tlak a ni a, Getafe striker hlui Alvaro Vazquez khung tur a dante chu ropui tak a ni.

Highlander boss Khalid chuan, "Tlarhmaah tun aia ṭha zawka kan khelh a ngai a ni," a ti a, an thiampuipa Federico Gallego chu 100% fit a nih loh avanga luhtir lo a nih thu a sawi bawk.

Zanin dar 7:30-ah Kolkata derby khelh a ni dawn a, East Bengal leh ATK Mohun Bagan inkhel boruak a 'hot' lo ngai lo - East Bengal midfielder Lalrinliana Hnamte chu club pahniha Mizo awmchhun a ni.

Zanin Inkhel Tur
East Bengal 7:30 PM ATK Mohun Bagan
Mumbai City 9:30 PM Hyderabad FC

November 28, Pathianni Zan
Bengaluru FC 7:30 PM Kerala Blasters