A hunah tak Leicester City an chak
Tluk leh din fawmin Leicester City an awm a, rinhlelhna mita thlir tute chhan nan Foxes chu a hunah tak an inlar. Brendan Rodgers-a naute hian Ningani zan khan an mikhual Legia Warsaw chu 3-2 in an sawp.
Premier League club hian point riat hmuin group C hmahruaitu an ni, an league match hnuhnung berah an hnuaia awm Napoli an hmachhawn dawn. Pathumna Napoli pawh hian tlang turin beiseina sang tak an la nei ve bawk a ni.
A hunah an rah
Beisei anga season hmang ṭha lo, hliamin a tih buai fo James Maddison-a'n inkhel bul a ṭan thei. English midfielder hian goal a khung bakah Wilfred Ndidi khung tur a siamsak; an match hmasa lama che ṭha tak Patson Daka pawhin goal hmasa ber a khung.
Foxes manager Rodgers chuan, "Chak ngei ngei a ngai tih hre chungin mikhual kan thleng a, kan duh leh mamawh ang takin kan khel chhuak thei. A pawimawh ber chu tun hun hi a ni a, kan chak avangin ka lawm.
"Chutihrualin inelna a la zo lo, kan khelh hmabakah chak ngei ngei kan la ngai dawn. Kan group-a team pali awm hi kan intiat tawk tlang takzet a, match hnuhnung ber kan khelh zawh hma chuan engmah sawi lawk theih a ni lo," a ti.
Napoli an tlawm
A tirah kha chuan Napoli leh Leicester City te hi harsa vak loa tlang tura ngaih an ni. Mahse, rin leh thlirlawk ang ngawt a ni lo, group C-a team pali awmte hi tlang thei vek an la ni! match hnuhnung berah an chingfel dawn.
Italian club hi Moscow khawpuiah 2-1 in an tlawm a, Russian club nen hian point sarih ve ve an hmu. An chunga awm Foxes an phak lohna chu point khat a ni a, a hniam bera awm Legia Warsaw aia an sanna chu point khat tho bawk a ni.
Leicester leh Napoli te an la inhmachawn leh dawn miau a, an hnuaia awm Spartak Moscow leh Legia Warsaw te tan kawng a la inhawng zau viaua ngaih a ni - table mawngphah luahtu Legia Warsaw pawhin hnehna an chang a nih chuan an la tlang daih thei bawk.
Inkhel dang
Season duhawm hmangtu West Ham chuan an tlin chian tawh hnuah pawh chak zel an la duh. Hammers hian Andriy Yarmolenko leh Mark Noble te goal hmangin Rapid Vienna chu 2-0 in an luhchhuah, point 13 hmuin group A hmahruaitu an ni chiang.
Inkhel dangah chak ngei ngei mamawh Rangers chuan Sparta Prague 2-0 in an hneh a, point sarih hmuin Lyon hnung an zui. Steven Gerrard thlaktu Giovanni van Bronckhorst-a enkawl Scottish club tan hian Alfredo Morelos chuan goal hnih a khung a ni.
Scottish champion hian knockout stage chinah chuan Champions League aṭanga tlan an hmachhawn a ngai dawn, group match khelh hmabak pakhat la nei mah se, an chunga awm Lyon an hneh a nih pawhin an umphak thei tawh lo.