Klopp-a'n rawlthar a ring

Liverpool boss Jurgen Klopp chuan zanin dar 8:30-a Southampton nen an inkhel tur atan player naupang zawkte chance pek a tum dawn niin a lang a, Reds Under 23 player zinga mi Elijah Dixon-Bonner chuan senior team training a zawm.

Kum 20 mi midfielder hian Liverpool senior team tan match hnih chu a lo khel ve tawh a, Klopp hian Saints lakah squad-ah a rawn dah tel thut a nih pawhin a mak lo ang.

Klopp hian kum 19 mi Tyler Morton chu kar hmasaa 4-0 a Arsenal an sawp ṭum khan a lo inlan tir tawh a, Champions League-a 2-0 a Porto an hnehna inkhelah Morton hi a khel tluan bawk.

German coach hian Harvey Elliott chu hliam a neih hma khan a regular player zingah a lo telh tawh bawk a, kum 54 mi coach hian a player duh zawng an nih chuan player naupang zawk hman lamah tim a tum lo hle.

Liverpool hian season duhawm tak an hmang mek. Premier League match 12 an khelh tawhah pathumna an ni mek a, hmahruaitu Chelsea chu point li chiahin an phak lo.

Group of death tia an chhal Champions League-ah match nga khel tawhin an chak vek bawk a, last 16 an lut chiang tawh - Atletico Madrid, AC Milan leh FC Porto te an hneh vek tawh!

Tun season-a Liverpool chet dan ngaihtuahin Saints tan Anfield-a lenluh a châkawm lo ang tih a chiang a, mahse, football a nih miau avangin eng pawh a thleng thei tih erawh hriat a ṭha.