Hmasawn kan ngai takzet - Conte

Tottenham Hotspur manager Antonio Conte chuan insiamṭhat an ngaih thu a sawi a, an ṭhat tawk lohna lai an hmuhchhuah belh zel thu a sawi bawk - Italian manager tan hnathawh tur a tam chho hle.

Ningani zan Europa Conference League-ah Spurs hian NS Mura chu 2-1 in an hneh lo. Slovenian club hi kum 2012-a din chauh kha a ni a, tunah hian PrvaLiga-ah pangana dinhmun luahtu an ni, anni laka tlawm hi North London club tan a zahthlak.

Minute 11-naah Tommy Horvat hmangin mualneitu lamin goal an khung hmasa, chawlhlawk hmain Ryan Sessegnon chu hnawhchhuah niin, goal an phurh bakah Spurs lamin player tlem zawk chunga an khelh a ngai.

Harry Kane-a'n goal khat hi sut ṭhen mah se, hun tawp dawnah beidawng duh loa khel Mura lamin Amadej Marosa hmangin an goal hnihna an khung a, mikhual team lam tan sut lehna hun a awm tawh lo.

Tottenham manager Conte chuan, "Tun ṭuma thil thleng ang hi chu ka duh loh zawng tak a ni. Chawlhkar thum leh a chanve hun ka hman hnu hian hnathawh ngai a tamzia chu ka hmu chhuak mek zel.

"Spurs ka enkawl thei hi ka lawm a, chutihrualin hnathawh ngai a tamzia min hriatpui turin ka duh. Mi tam tak chuan hnehna chanpui nghal pup pup turah min ngai a ni mai thei, a takah erawh chutiang ngawt chu a ni lo," tiin a sawi.

Group G-ah Tottenham hi pahnihna an ni mek a, an chunga awm Rennes an phak lohna chu point li a nih tawh avangin engti kawng mahin group hmahruaitu an ni thei tawh lo, tlang tur pawhin an match hnuhnung bera chak an mamawh dawn.

Italian manager hian a striker ṭha Harry Kane chu NS Mura lakah inkhel bul a ṭantir. England captain hi ram tan khel ṭha viau mah se, tun season atan chuan Spurs tan duhthusamin a la che hleithei lo, ram tana a ke hmui kha Spurs jersey a hakin a reh ruih zel.

Tottenham hian Pathianni zan dar 7:30-ah Premier League khel turin Burnley an lenchilh zui dawn a, league lamah tal result ṭha neih chhunzawm an tum ang.