Argentina leh Messi veltu Mbappe

Kylian Mbappe chuan khawvel rawlthar beiseiawm ber a nih zia a pholang chiang leh ta. Kum 19 mi Mbappe-a'n Argentina lakah goal hnih a khung bakah penalty hlawh chhuakin France chu 4-3 in hnehna a chan pui a–World Cup 2018 quarterfinal a hruai thleng.

Inrinni zan Kazan Arena-a inkhelah ṭan hmain Messi chu hming langsar leh sawi hlawh ni mah se, minute 90 an khelh zawh hnuah erawh Mbappe chu chanchin ngah zawk a ni. 'King of Football' tia hming lem an pek Pele-a'n 1985 final khan Sweden lakah goal hnih a khung tawh a, Brazil legend hnuah Mbappe hi kum 20 hnuai lam mi World Cup match khata goal hnih khung thei hmasa ber a ni.

1998 World Cup champion France hian July 6 zan dar 7:30-ah Portugal hnehtu Uruguay nen quarterfinal an khel ang a, World Cup hnuhnung ber finalist Lionel Messi te ram erawh an beiseina a thamral, a thiam pariat zingah an tan hmun a awm ve lo.

Goal khat ve ve
French coach Didier Deschamps-a'n an khingpui hlauhawm zia a hrechiang a, midfielder tharum ngah Paul Pogba leh N'Golo Kante te chu midfield-ah an inkawp a, tlarhnung pui ṭha turin thupek an dawng tih a khelh danah hmuh hmaih rual a ni lo. Les Blues hian Argentina hmatawng ten ball an hloh zeuh kara rang taka nawr let chu an tum. Ṭan hnu lawkah Mbappe a dawk chhuak nghal zawk a, a freekick hmuh chu Antoine Griezmann-a'n petin goal bar a per dawp–Jorge Sampaoli naute an him phawt.

Mahse, La Albiceleste an him rei lo. Paris Saint-Germain forward Mbappe-a'n halfway line hma lam aṭangin chak zetin an khingpui penalty box thleng rakin ball a tlan pui chu Nigeria laka chakna goal khungtu defender Marcos Rojo-a'n ti tluin penalty a chawi–a pet tura ding chhuak Griezmann chuan minute 13-naah hmahruaina goal a khung.

Group stage aṭanga beisei phak lo Argentina-in beisei aiin France an khel thei a. Goal an phurh hnuah winger langsar lo tak Angel di Maria chuan minute 41-naah yard 30 a hla aṭangin si phurh sut nan a pet goal a, Les Bleus keeper Hugo Lloris leh France team barakhaihin inkhel a nung thar a, halftime-ah 1-1 a ni.

Hei le Mbappe
Second half ṭan aṭanga minute thumna lekah Messi inlarin a ball pet chu Gabriel Mercado-a'n dang pialin France goal-ah a lut. Harsa taka last 16 lut Argentina chu mit khap kar lekah dinhmun ṭha zawkah an ding.

France-in rinkai an nih chhan rawn pholang zuiin minute 57-naah vei lam aṭangin wing back Lucas Hernandez chuan cross lutin right back Benjamin Pavard chuan hlap nghalin kawh zetin Argentina goal-ah a vir lut. Deschamps hoten Mbappe hmangin Argentina tlarhnung buai chu an chhu let nghal zat a, Mbappe-a'n box chhungah talbuai loin 64-naah hmahruaina goal a khung. AS Monaco leh PSG tana Ligue 1 title la tawh forward hian minute li hnuah Olivier Giroud-a ball pek chu cool zetin a khung leh a, France player-ten Argentina tlarhnung an ṭhiat hneh hle.

France tana World Cup-a goal khung thei naupang ber Mbappe chu star rual awm khawm zingah a langsar ber a, injury time-a Sergio Aguero tauh goal leh hemi goal siamsaktu Messi te meuh pawhin French rawlthar duhawm par vul lai hi an hliah zo lo.

Mangṭha Messi
Qualifying aṭanga team din hleithei lo Sampaoli chuan Les Blues lakah pawh midfield leh tlarhnung a la remkhawm fuh thei chuang lo. Ball an hloh hlekin an tlarhnung thlengin a nghing nghal dawt zet a, kum 34 Javier Mascherano khel ṭha viau nachungin a vanglaia ball pass thiam leh chhuhsak thei hmingthang a nihna ang a phak chiah tawh bik lo.

Argentine coach Sampaoli-a'n Sergio Aguero leh Gonzalo Higuain leh Paulo Dybala te bench-ah a dah, striker a koh pathumte chu inkhel bul a ṭantir ngam lo. Russia ramah Sampaoli-a'n thutlukna a dik thei meuh lo a, Messi telna a nih avanga champion rinkai zinga tel phak hian champion an phu lo France hmaah an pholang nawn. Les Bleus lakah hian Argentina hian hnehna chang pawh ni se Javier Mascherano, Ever Banega leh Nicolas Otamendi te hrem vanga quarterfinal-a chhawr theih an nih dawn chuang loh avangin round sang zawk thleng turin theihna an nei lo a, Messi mangṭha a ṭul bawk.

Eng nge an sawi?
Argentina boss Jorge Sampaoli chuan, "Ka nau ten an theihtawp an chhuah chunga chak loh hi a na hle. Russia kan pan chhan ang kan ti hlawhtling lo hi pawi ka ti takzet," a ti a, a hma hun erawh a sawi chian nghal theih loh thu a sawi bawk.

France coach a nih hnua a naute match 80 kaihruai tling chiah Didier Deschamps a lawm, an ram manager zinga hna ngai chelh rei ber Deschamps chuan, "Kan team hi an la naupang rual hle a, 2-1 a nih hnua kan beih let dan khan hlawhtlin kan duh zia a lantir. Thui zawk kan thlen theih nan tih tur ṭul zawng zawng kan ti vek ang," tiin a sawi.