Brazil leh Neymar tan tluk loh hun!
Argentina leh Portugal kan mangṭha hnuah zanin dar 7:30 hian champion tura rinkai zinga mi Brazil an inlan ve leh dawn a, Selecao hmaa ding tur hi Mexico an ni–a awlsam dawn lo.
Brazil hian an match hmasa berah Switzerland an inhnehtawkpui a, Costa Rica (2-0) leh Serbia (2-0) hneh zuiin last 16 an lut. Match tinah hmasawnna hmuh tur a awm a, last 16-a anni 'kher' tum hi thil chakawm a ni hauh lo ang.
Mexico dinhmun sawi thiam a harsa. He team hian an match hmasa berah game hmuhnawm pho chhuakin champion lai Germany (1-0) in an hneh a, South Korea (2-1) an hneh zui bawk.
Fakna karah El Tri an zuih ral zui. Match tawp berah Sweden chu 3-0 ngawtin an ngam lo a, last 16 lut turin South Korea puihna an mamawh phah. Korea kha Germany lakah tlawm se chuan goal difference hmangin an tla daih thei!
Match hnuhnung ber aṭanga teh tur an nih chuan Mexico hi Brazil tan 'hlauhawm' tia chhal theih an ni lo a, an match hmasa pahnih aṭanga teh tur a nih erawh chuan Tite leh a naute pet chhuak turin an ṭha tawk.
Ding rih rawh Neymar!
World Cup-a Neymar chungchanga sawi hlawh tak pakhat chu a thiamna piah lamah a tlu 'hnem' lutuk hi a ni–khawvela footballer manto ber hian Costa Rica lakah goal a khung a, Serbia lakah assist a nei bawk.
Mahse, khelmualah holam taka tluk a ching–Costa Rica laka penalty a hlawhchhuah chu video assistant hmanga enlet a nih hnuah 'tluk der' avangin sut a ni a, match official a hnial avangin yellow card pek a ni bawk.
South American football expert Tim Vickery chuan, "Chanchinbu pakhat chuan Neymar hi World Cup-a a inlan tawhah minute kaw dana tlu ziah angin an ziak a, headline-ah an hmang hial a ni," a ti!
Kum 26 mi forward theihna san ziaah inhnialna tur a awm lo–Brazil tana match 88-a inlanah goal 90 (56 goals, 34 assists)-ah a inrawlh tawh. Zanina Brazil mipui mamawh tur chu Neymar 'tluk' tam loh a ni a, goal a ken tel an beisei bawk ang.
Tlarhnung leh Brazil
Tite ṭawngkam lar tak an sawi chu, "Zir dan ka zir thiam ta," tih hi a ni. Brazil coach hian he thu hi European football-a defensive game a 'zir' hnua a sawi a ni a, he 'style' hi attacking football hmuhnawm pholang ṭhin Brazil-ah a tuh. Hei hi Tite danglamna chu a ni. Attacking game hmuhnawm tak pholang chungin tlarhnung a remphui theih tih a hria.
An match hnuhnung 14-ah goal thum chiah an chhuah a, tlarhmaah Neymar, Gabriel Jesus, Philppe Coutinho leh Willian te a neih bawk si avangin he Brazil team hi an 'him' tia sawi ngam a ni. Hetihrual hian Brazil tan thu hriat nuam lo a awm a, team doctor Rodrigo Lasmar chuan Serbia laka inhliam Marcelo leh Douglas Costa dinhmun a la chian loh thu a sawi.
El Tri fan-te an match tawp berah 'Korea, Korea' tiin an au rual. Hei hian Sweden laka an khelh dan chiang takin a hrilhfiah. Mexico midfielder midfielder Marco Fabian chuan hei hi hriain, "Sweden laka kan khelh dan anga kan khel leh a nih chuan kan duh aia hmain kan haw mai ang," a ti. Zaninah Brazil zawk thawn haw an tum ang.
Mexico tlarhmaa Carlos Vela, Javier Hernandez leh Hirving Lozano te inkawp hi sawi hmaih thiang a ni lo–player pathum hi Germany leh South Korea dah niltu kha an ni. Zaninah pawh anni pathum hmang hian counter attack-in an nawr let dawn a, chumi dawl zo tur chuan Brazil an inrem a ṭul ang.