Cavani-a'n Ronaldo a thawn haw

Khawvel footballer piang tawh zinga ropui ber zinga mi Cristiano Ronaldo-a'n 'Khawvela ennawm ropui ber' tih meuha hming an pek World Cup chawi loin football khawvel a mangṭha dawn niin a lang ta.

Inrinni zan khan round of 16-ah Uruguay chuan 2-1 in Portugal an hneh a, quarterfinal-a France tawng turin an inpet tling. South American team tan Edinson Cavani chuan goal hnih a khung a, Ronaldo leh a ṭhiante tan Russia chhuahsanna tur 'ticket' a lak sak!

Portugal tan defender Pepe chuan goal khat khung ve mah se European champion chhanhim nan a tawk zo lo. World Cup 2022 khelh a nih leh hunah meuh chuan Ronaldo pawh kum 37 mi a ni tawh dawn a, Real Madrid forward tan Qatar-a zin ve beisei chi a ni tawh lo.

Cavani & Suarez

Portugal-in Ronaldo an nei a, Uruguay-in Cavani leh Luis Suarez an nei thung. Minute sarihna lekah striker pahnih hian an thiamna an pholang nghal a, an goal hmasa ber khung turin mawi zetin ball an inpe kual.

Cavani-a'n halfway line aṭanga ball a khalh phei hnuin mual vei lam sira awm Suarez tan ball a thlawh phei. Barcelona forward hian dinglam sir aṭanga chak taka Cavani rawn tlan lut chu hmuin box chhungah ball a thlawh lut lehnghal a, Paris Saint-Germain striker hian ṭha zetin a tauh lut.

Striker pahnih ball inpek kual danah technique mawi bik, timing dik leh team work hmuh tur a awm a, hun rei tak lo inkawp tawh striker an nihna a hriat hle. Kum 31 mi Cavani-a'n ram tan goal 45 a khung ta a, heng zinga 12 chu Suarez-a siam sak a ni.

Second half-a an goal hnihna a khung hnuah Cavani hi hliam vangin lakchhuah a ni a, Uruguay coach Oscar Tabarez chuan, "Tunah chuan a hliam vang hian kan hlauthawng em em a ni ringawt a, a dinhmun tur a la chiang lo," a ti.

Ronaldo a bo!

Portugal-in minute 55-naah an si phurh sutna goal an khung a, goal khungtu hi Ronaldo ni loin Pepe a ni. Portugal hlim chhung erawh a rei lo, an si phurh an sut aṭanga minute sarih hnuah Cavani-a'n Uruguay goal hnihna a khung a, goal 'class' huang chhunga mi a ni.

European champion team-in Ronaldo nei mah se Spain laka hattrick siamtu forward hmuhtur a awm lo. Uruguay tlarhnung lakah chuan forward satliah ve mai a ni a, Diego Godin a ngam lo.

Kum 33 mi forward hian World Cup-a knockout round vawi li a khelh tawhah goal a la khung miah lo. First half chhung zawng khan penalty area-ah ball a khawih lo a, minute 90 chhungin goal zawnah vawi khat chiah shot a nei.

Portugal coach Fernando Santos chuan, "Cristiano hian football-ah hmabak tam tak a la nei a, player naupang zawkte pui turin he team-ah hian a la awm reng ka beisei a ni," tiin Ronaldo chu international football chawlhsan rih lo turin a ngen.