Ramthar an champion

MBBA hriatpui inelna Chawnpui Inter Branch YMA Basketball Tournament final-ah Ramtharin inelna buatsaihtu Chawnpui chu Inrinni zanah 74-62 a hnehin an champion. MVP atan Ramthar guard Zonunsanga chu thlan a ni a, ani hi MSL hnuhnung bera Zarkawt BCA champion puitu a ni.

Chawnpui Sports Centre-ah entu a ṭhahnem a, final hmuhnawm takah Chawnpuiin halftime-ah 39-32 in hma an hruai a, amaherawhchu team ṭha zawk lan hun fourth quarter-ah inelna buatsaihtuin point ruk chauh an neih laiin Ramtharin point 23 zet an nei a, an phu ang ngeiin hnehna an chang.

Champion team Ramthar hi Dawrpui Vengthar buatsaih inelnaah pahnihna an ni a, tun ṭuma an champion leh takah chuan CYMA Basketball awm turah seeded number 1 an ni thei ang. Champion team hian Rs 1,00,000 an dawng a, pahnihna Chawnpui hian Rs 50,000 an dawng ve bawk.