Belgium hmaah ram vannei Japan

FIFA World Cup history-a fair play conduct hmanga knockout stage lut hmasa ber chu Japan an ni a, Samurai Blue hian zanin dar 11:30 hian Rostov-on-Don Stadium Belgium an hmachhawn dawn.

Red Devils hian Premier League-a hming langsar Eden Hazard, Kevin de Bruyne leh Romelu Lukaku te an kawl avangin Japan lakah rinkai zawk an ni dawn. Amaherawhchu, knockout inelnaah chuan van­neih ṭum leh vanduai ṭum awm thei a nih avangin Asia aiawh ram hi tla tura dah ngawt thei a ni lo.

Belgium hun?

Belgium football-ah nasa takin tun hnaiah hma a sawn a, 2002 World Cup hnua inelna liana an tel hnuhnun ber chu 2014 World Cup chauh kha ni mah se player an neih ṭhat avangin champion thei tur team zingah hming an tel.

World Cup leh Euro C'ship hnuhnung berah Red Devils hian quarterfinal an thleng ve ve a; Argentina leh Wales hneh loin an tla. An striker Lukaku chuan Russia ramah goal li a khung tawh a, amaherawhchu Belgium leh Manchester United striker an sawiselna chu team ṭha an ngam lo tih hi a ni.

Belgium hi tunah FIFA ran­king-ah 3-naah an awm mek a, an khingpui Japan erawh 61-na an ni pha chauh. Team tenau ngam tiha an sawi ṭhin Lukaku pawh inhliam vanga Tunisia nen lakchhuah a nih hnuah a dam ṭha leh tawh a, golden boot dawn a tum a nih chuan zanin hi hun ṭha a ni.

Japan an thiam

Samurai Blue hian match hnuhnung berah Poland hneh lo mah se Colombia an hneh thei a, Senegal nen inhnehtawk bawk avangin Asia aṭanga dam awmchhun an ni.

Result ṭha nei turin player pawh an nei ṭha a, Belgium nen hian Poland nena bul ṭan lo SD Eibar midfielder Takashi Inui, Cologne forward Yuya Osako leh Manchester United midfielder hlui Shinji Kagawa ten bul an rawn ṭan leh thei tawh ang.

Bench-ah tawnhriat nei ṭha Keisuke Honda a awm a, ani hian bench aṭanga lutin assist bakah goal a nei tawh. Japan player tam zawk hi Europe-a khel an ni a, Belgium tan en liam theih an ni lo ang. Knockout stage a nih tawh avangin penalty shootout a awm thei a, kum 2010 khan Japan chuan last 16-ah hian Paraguay chu penalty shootout-ah an hneh lo.