Wimbledon hun a thleng

Vawiin ṭangin tennis tourna­ment upa ber Wimbledon chu All England Lawn Tennis Club-ah khelh ṭan a ni dawn a, seeded pathumna Marin Cilic chuan a match hmasa ber atan Japan tlangval Yoshihito Nishioka a hmachhawn ang.

Zanina first round inkhel tur zingah Grand Slam vawi thum champion tawh Stan Wawrinka leh seeded parukna Grigor Dimitrov te chu an langsar. Champion lai leh he hmuna vawi riat ngawt title la tawh Roger Federer chuan Dusan Lajoviac a bitum dawn bawk - French Open champion hlim Rafael Nadal erawhin Thawhlehni zanah a match hmasa ber a khel chauh dawn a ni.

Hmanlai

Kum 1975 khan US Open khelhna chu hard court-ah thlak a ni a, Australian Open pawh (1988) hard court-ah bawk an thlak. Inelna lian pahnih khelhna an thlak hnuah Wimbledom chauh hi Grand Slam tournament zinga 'Grass Court' a khelh awmchhun a ni tawh.

1877 aṭanga khelh ṭan Wim­ble­don hi a tir kum sarih chhung chu mipa inel nan chauh hman a ni a, mahse 1884 aṭang khan hmeichhia an telh ve bakah hemi kum tho hian doubles inelna neih ṭan a ni bawk. Mipa champion hmasa ber chu British mi Spencer Gore niin, hmeichhe champion hmasa ber chu Maud Watson a ni.

Khawvel indopui pakhatna vangin (1915 - 1918) inelna neih theih a ni lo a, indopui pahnihna neih lai kum 1940 - 1945 chhung pawh khan tournament hi chawlh lailawk a ni bawk. Heng hun lian pahnih tih lohah hi chuan tluang takin nikum thleng khan an nei zel.

Inkhelh kalphung

Mipa singles hi 'best-of-five set' hmanga chak zawk zawn ṭhin a ni a, inelna dang zawng erawh chu 'best-of-three set' khelh a ni thung. Set tinah game ruk ve ve an lak chuan 'tiebreak' hmangin set la tur zawn a ni.

Kum 1922 hmalam kha chuan champion lai te hian first round khelh ngai loin an bye ṭhin. Amaherawhchu, he dan hi kum 1922 hnulamah erawh hman zui a ni ta lem lo - champion lai pawhin first round aṭangin an khelh a ngai tawh a ni.

Grand Slam dang ang lo takin Wimbledon-ah hi chuan kawr thawmhnaw rawng inang an ha ṭhin, tun hma chuan a hring dal leh senduk an ha ṭhin. Mahse an thawmhnaw rawng hi thlakin kum 1949 aṭang khan player zawng zawng ten a var an ha vek tawh thung. A var hlang hlak ni lo rawng danga chei ran deuh pawh phal a ni tawh.

Player-te thawmhnaw hak an duhtui ang tho hian tournament a mi pawimawh chin chuan thawmhnaw rawng inang an ha tlangpui. Kum 2006 aṭang khan official, ball boy leh ball girl te chuan American designer Ralph Lauren a siam uniform inang kawr pawduk leh a paw uk an ha bawk.