James-a'n England hmachhawn dawn?

Colombia midfielder James Rodriguez chu hlauhthawn ang aiin a hliam a na lo nia sawi a ni a, Bayern Munich forward hian Thawhlehni zana World Cup last 16 an khelh hunah England a hmachhawn hman an beisei - Three Lions tan thu hriat nuam a ni lo tawp ang.

Colombian FA chuan, "James hian a ke dinglamah hliam a tuar a, uluk taka endik a nih hnuah hlauhthawn ang a ni lo tih hmuhchhuah a ni," an ti a, England lakah starting XI a chan a rinawm.

Kum 2014 World Cup Golden Boot dawngtu hian match hmasa bera Japan an hmachhawn ṭumin hliam vangin inkhel bul a ṭan thei lo, Poland nen an inkhelh hnuah damin assist vawi hnih a rawn nei a, mahse Senegal nen an inkhelh ṭumin hliam vang bawkin lakchhuah a ni.

Senegal laka minute 30 chauh a khelh hnuah hian team training pawh a zawm thei lo a, coach Jose Pekerman chuan a player dinhmun chuan a tih hlauhthawn thu a sawi bawk.

Mahse, hlauhthawn ang em a lo ni lo a, Poland laka inkhel hmuhnawm pholangtu hi England hnawt chhuak turin a inbuatsaih ang.