Three Lions hmaa inchhawp 'Nomawi'
"A lo kir ngei dawn e," tiin England fan-te chu hlimin an zai der tawh a, kum 1966 hnua a vawi khat nan champion an inbeisei a, kum 1863-a khawvel hmun dang zawnga an khelh ve hmaa an lo khelh tawh football-a nomawi ropui ber World Cup chawi theih inbeiseina sang tak an nei.
Mahse, heng zawng zawng thleng tur hian England-in tih tur hmasa an nei a, chu chu zanin dar 11:30-a Colombia hneh phawt a ni–quarterfinal luh inchuhin team pahnih an intawng dawn a, intluk tawk taka ngaih an nih avangin chak tur zawk rinthiam a harsa hle.
Colombia hian an match hmasa berah Japan ngam lo mah se Poland leh Senegal hneh zuiin last 16 an lut a, match tawp ber thlengin an 'fight'.
England erawh Tunisia leh Panama an hneh nghal avangin hahdam takin knockout round an lut a, Belgium nena an intawn ṭumin player chhawr rim ho chawlh hahdamtir an nih avangin Three Lions tak tak teh nan a tling tawk lo.
A danglam lo
Round of 16 chu group stage ngawt ai chuan boruak pawh danglam deuh tura ngaih a ni. Mahse, England boss Gareth Southgate tan erawh a danglamna a awm lo a, Colombia chu hahdam taka an hmachhawn tur thu a sawi.
English coach chuan, "Thil thlak danglam vak a ṭul lo a, khelh dan phung thlak loa a ngai renga kal hi a pawimawh chu a ni. Theihtawp chhuahin kan thawkrim em em a, kan tumah kan chiang em em bawk," tiin Colombia hneh ngei an tum thu a sawi.
England midfielder Jordan Henderson pawhin inkhel tur thlir lawkin, "Colombia team ka en a, Radamel Falcao, James Rodriguez leh Juan Cuadrado te hming a lo intlar nghal avangin team ṭha an ni tih a chiang. Tlarhnungah Davinson Sanchez te an la awm bawk.
"Mahse, a pawimawh ber chu keimahni lam a ni a, kan theihna anga kan khel chhuak a nih phawt chuan Colombia hneh tur hian kan ṭha tawk a ni," a ti a, 2014-a quarterfinal an luh bak a thiam pariat zinga la tel ngai lo Colombia an hneh theih a inring.
Kan ram tan
England coach Southgate chuan, "Hnam hla kan sak lai hian ka rilru zawng zawngin ka sa ṭhin a, ka hun tawn liam ta zawng zawng kha ka ngaihtuahnaah lo lutin ka hnuk a ulh hial ṭhin," tia ram tana a ngaihtuahna zawng zawng a sen ṭhin thu a sawi–ram tana a ngaihtuahna ṭhat tawk leh tawk loh zaninah a hriat ang.
Southgate chuan, "Ram tana World Cup khel phak nih kha ka duh ṭhin a, chu chu ka hlawhtlin tir thei. Kan ram manager ka ni leh a, England tana World Cup-a player leh manager anga kal kawp thei palina ka ni tih ka hriat phei kha chuan ram hmangaih em em tu ka nih avangin ka lawmna a zual a ni," a ti.
Kum 47 mi manager hian player a nih laiin ram tan match 57 a khel hman a, Euro 1996-a semifinal an luh ṭum khan minute zawng zawng a khel kim a, Germany nen final lut tur zawnga an inkhelh ṭumin penalty shootout-ah a khung loh avangin final an lut lo a, hun rei tak hnua England-in major tournament final luh an tumna chu a thamral phah.
World Cup 1998 leh Euro 2000-ah England tan a inlan chhunzawm a, 2002 World Cup squad-ah tel mah se a inlan lo thung–heng tournament-ah te hian quarterfinal aia sang an thleng lo vek. Southgate-a'n player a nih laia a tihsual siamṭha turin hun ṭha a nei a, Colombia fiahna a paltlang zo ang em tih chu zawhna a ni.
Innghahna Kane
Harry Kane-a'n tun World Cup-ah shot vawi ruk chiah a la nei a, goal nga a khung tawh thung! Tottenham Hotspur striker hi a goal khung zata aṭanga teh chuan a ropui a, a goal khung dan erawh chhuang taka insawi chi a la ni lo.
Kum 24 mi striker hian Tunisia laka goal hnih a khung hnuah Panama lakah hattrick a siam–mahse a hattrick siamna inkhelah hian goal hnih chu penalty aṭanga lut a ni a, goal khat dang hi Ruben Loftus-Cheek shot a dan per luh a ni.
Zaninah erawh Kane tak tak hmuh English mipui ten an beisei dawn a, Colombia tan dan a awlsam lo ang. Spurs striker hian goal nga a khung miau avangin inrintawkna a ngah dawn tih a chiang a, Belgium laka chawlh hahdamtir a nih bawk avangin tha tho takin Colombia a hmachhawn ang.
Spurs-a Kane nena khel dun, Colombia defender Davinson Sanchez chuan, "Spurs WhatsApp group kan nei a, kan ram team chakpui leh goal khung kan awm chuan duhsakna kan in hlan ṭhin. Tunah erawh duhsakna inhlan hun a ni lo a, Harry hi dan ka tum dawn a ni," tiin Kane dan chah an tum tur thu a sawi.
Thlirlawkna
England-in 2006 hnua a vawi khat nan World Cup quarterfinal an lut thei dawn. Round of 16-a an chak hnuhnung ber chu 2006 hi niin Ecuador chu David Beckham freekick hmangin 1-0 in an hneh.
Three Lions-in group stage-ah ringawt goal riat an khung der tawh a, tun aia World Cup-a goal an khung hnem zawk ṭum chu 1966 (11) kha niin an champion.
World Cup 1998-ah khan group stage-ah team pahnih an intawng a, 2-0 in England an chak. Hemi hnua World Cup match riat an khelhah Colombia-in goal an la khung vek.
Jose Pekerman-a'n World Cup-a team a kaihhruaiin knockout round a la luhpui vek. Kum 2006 khan Argentina chu quarterfinal a thlen pui a, 2014 khan Colombia hi quarterfinal a hruai thleng bawk.
England player te chuan World Cup-a an match fee chu ṭanpui ngaite chhawmdawl nan an hlan dawn. England player-te hian last 16 an luh avangin £54,000 (Rs. 48,81,605) ṭheuh an dawng tawh a, an champion chuan £215,000 ṭheuh an dawng ang.