Team intiat tawk Sweden vs Switzerland
Player enin khawvela langsar ber ber an kawl lo a ni mai thei a, squad enin team tam tak angin an chhah tawk lo a ni mai thei.
Mahse, World Cup-a team hmuhnawm pawl kan thlang chhuak dawn a nih chuan Sweden leh Switzerland an tel ngei ang. Zanin dar 7:30-ah team pahnih hi round of 16-ah an inhmachhawn dawn a, a thiam pariat zinga tel an inchuh dawn.
Sweden coach Janne Andersson chuan, "Penalty kan zir lo," tiin penalty nghah thlen an tum loh thu a sawi a, minute 120 piahlam thleng hnehna chang tura nghah thlen a tum lo.
Player hrem
Yellow card vawi hnih hmu tawh player chu match khat khel thei lo tura hrem an ni ṭhin a, Switzerland leh Sweden-in an match tawp ber thlenga last 16 dinhmun tihchian an mamawh avangin player an khek thei lo a, zaninah player pawimawh an chhawr thei lo nual dawn.
Sweden midfielder pawimawh veteran midfielder Sebastian Larsson chu hrem vangin a inlan thei dawn lo a, Viktor Claesson, Mikael Lustig leh Albin Ekdal ten yellow card an hmuh chuan quarterfinal lut pawh ni se an inlan thei lo bawk ang.
Switzerland tana thu hriat nuam lo tak chu captain Stephan Lichtsteiner leh Fabian Schar te chu hrem vangin an inlan ve thei dawn lo bawk a, Valon Behrami, Denis Zakaria leh Xherdan Shaqiri te chu yellow card vawi khat hmuha hmabak match hloh thei dinhmunah an ding bawk.
Sweden leh tlarhnung
Sweden-in an match hmasa berah South Korea an hneh hnuin Germany an ngam lo a, Mexico lakah 3-0 ngawta chak zuiin last 16 an lut. Germany laka an chak loh ṭum pawhin Sweden hi an vanduai tia sawi theih a ni a, he team hi namnul chi an ni lo.
Blue Yellow (Sweden sawina) boss Janne chuan goal venhim an ngaih pawimawh hmasak thu sawiin, "Player zawng zawngin an hriat hmasak tur chu defender an ni vek tih hi a ni a, chumi pho chhuak chiang ber chu Marcus Berg leh Ola Toivonen te an ni.
"A ṭul hunah goal an veng a, a ṭul hunah goal an nawr," a ti a, chak tura goal venhim hmasak a ṭul thu a sawi - Germany laka goal hnih an chhuah tih loh kha chu goal chhuah an la nei lo.
A harsa dawn
Swede team-in fak an hlawhna chu an palian a, an tharum ngahna an hmang thiam em em bawk. Swiss midfielder Valon Behrami pawhin hei hi a hai lo, "Player lian leh chak tak an ni a, kan tan chuan a harsa dawn a ni," a ti.
Hei vang tak hian coach Vladimir Petkovic-a'n starting XI tur a ngaihtuah hunah a ngaihtuahna a sen ṭhat a ṭul ang. Tlarhnung laiah hrem vanga inlan thei lo Schar aiawh turin Nico Elvedi leh Johan Djourou thlan tur a nei - tharum ngah leh palian Djourou zawk hi thlan a nih a rinawm a, "Ka inpeih tawh," tiin Swede tlarhma palian rual ven a tum.
Switzerland hian an match hmasa berah Brazil an inhnehtawkpui hnuin Serbia an hneh a, Costa Rica an inhnehtawkpui bawk. An result enin an chhe lo tih a chiang a, Xherdan Shaqiri leh Granit Xhaka an neih bawk avangin Sweden tan fimkhur a fin thlak ang.