Zaninah Halep leh Sharapova
Tennis tournament upa ber Wimbledon khelh mekah zanin hian hmeichhe champion tura rinkai Simona Halep a inlan dawn a, grass court inelna liana hlawhtlinna chang tawh Maria Sharapova pawhin a match hmasa ber a khel bawk ang.
Grand Slam champion thei lo tia sawiseltute chhan nan Halep-in French Open nomawi a chawi tawh a, tun inelnaah hian world number Halep hi seeded pakhatna ni chungin a inlan dawn a, match hmasa bera a khingpui tur hi Kurumi Nara a ni. Japanese nula Nara hi world ranking lamah 91-na a ni a, Romanian star hi harsa lutuk loin chak tura rinkai a ni.
2004 Wimbledon champion Sharapova pawhin a match hmasa atan world number 172 Vitalia Diatchenko a hmachhawn dawn. Russian nula Sharapova hi tun hma aṭang tawhin inelna lianah a khel ṭha ṭhin a, kuminah pawh beisei a nei sang ang.
Amaherawhchu, Sharapova hian thla 15 chhung hremna a hman zawh hnuah major title a la vaw chhuak leh miah lo a, Grand Slam nomawi panga a neih tawh sa neih belh tur chuan a hna a hautak chho hle ang.
Hmeichhe singles champion lai Garbine Muguruza pawhin a title humhim tur chuan fiahna hautak a paltlang a ngai dawn. Spanish star chuan, "A nihna takah chuan tournament kan khelh tur apiang hi ngam sarhin ka khel ngai meuh lo, first round-a NaomiBroady nen kan inkhelh tur aṭangin fimkhur a ngai dawn hle," tiin a sawi.