Hnehna changtu Marquez a tlan fal

Pathiannia tlan Dutch Grand Prix-ah Marc Marquez (Honda) chuan Alex Rins (Suzuki) leh Maverick Vinales (Yamaha) te hnehin pakhatna a ni a, season tawpa nomawi chawi tur inumna lamah a elpui rider dangte lakah a tlan fal ta hle.

TT Circuit Assen-ah Mar­quez hian minute 41 leh second 13.863 chhungin hnehna a chang a, rider championship lama a elpui Valentino Rossi (Yamaha) chu panganaah a thleng phak chauh thung. Marquez hian Italian rider Rossi lakah point 41 zetin hma a hruai fal tawh a, a nomawi hum­him turin kawngdik a zawh mek.

Season dang ang bawkin Dutch Grand Prix a hmuhnawm leh a, rider an inel tawk em avangin an intlanpelh zat belhkhawm chu vawi 100 chuang a ni! Pakhatna Marquez leh pasarihna Jorge Lorenzo te hi second 4.462 chiahin an inthlau. Podium-a lawm phak pathum Marquez, Rins leh Maverick Vinales te chu Spanish rider vek an ni.

Marquez a lawm

Kum 25 mi Marquez chuan, "A harsa dawn tih kha chu ka hre lawk a, a bik takin kawng ngil laia tlan chak dawn tak khan thli a tam avangin a harsa hle. Dawhtheih a ngai hle a, rider tinte kha an inum nasain an intlanpel nasa em em a, a tawpah chuan dawhtheihna rah a lang," tiin a sawi.

Honda rider Marquez hian awlsam takin hnehna a chang mai bik lo, lap hnuhnung ber an tlan thlengin an inum tawk hlawm hle. A hnunga tlan, Suzuki bike khalhtu Rins nen an inthlauhna chu second 2.269 chiah a ni.

MotoGP vawi li champion tawh Marquez chuan, "Lap hnuhnung pathumah kha chuan ka theihna zawng zawng ka hmang a, tih theih ka neih zawng zawng chu ka ti kim. Kan intlansiak kha sawifiah thiam pawh a harsa zawk hle, a khaikhawm nan chuan a hmasa bera thlen chu engtiklai pawhin a ṭha," a ti.

Pasarihna Lorenzo

Tun hnai intlansiak hnu­hnung pahnih Italian leh Spa­nish Grand Prix lama hnehna changtu Jorge Lorenzo-a'n qua­lifier a tlan ṭha tawk lo a, 10-na aṭanga bul a ṭan avangin beisei a sang lo. Mahse, Ducati rider hian intlansiak bul a ṭan fuh a, a tir lamah phei chuan a hma lamah a tlan deuh reng thei. Amaherawhchu a vannei reng bik lo - intlansiak a zawh meuh chuan pasarihnaah a lungawi a ṭul.

Season thar aṭanga Honda bike khalh tur Lorenzo chuan, "Zing lamah ka pumna vangin enkawl ka ngai a, ka tan chuan intlansiak harsa tak a ni. Chuti chunga point ka hmu thei erawh ka lawm hle," a ti. Kum 31 mi Lorenzo hian Dani Pedrosa thlakin season tharah Honda bike a khalh dawn a, tunlai rider hmuhnawm ber pakhat Marquez nen an awmdun dawn tihna a ni.

Tun season chhungin MotoGP intlansiak hi vawi 19 a awm dawn a, heng zingah pariat chu an tlan tawh. July 13 hian German Grand Prix an tlan ang a, a hmawr bawkna tur chu November thla a tlan tur Spanish Grand Prix a ni ang.