A vawi 12 nan Chong Wei

Malaysian veteran Lee Chong Wei chuan Japanese shuttler chhuak thar Kento Momota chu 21-17, 23-21 a hnehin Malaysia Open title chu a vawi 12 nan a chawi a, ani aia record nei ṭha an awm lo. Hmeichhe singles lamah seeded pakhatna Tai Tzu Ying chuan Chinese nula He Bingjiao chu 22-20, 21-11 a hnehin a champion ve bawk.

Pathiannia final khelh­ah khawtual tlangval Chong Wei hian a tir aṭanga a tawp thlengin inkhel a thunun a, kum 35 mi ni tawh mah se a la che rangin a zuan a la zang ṭha hle. Lee hian April thla a khelh zawh tak Asian Championship quarterfinal-ah khan Momota hi a ngam lo a, tun ṭuma hnehna chang tur hian darkar khat leh minute 11 a mamawh.

World number 1 hlui Lee chuan, "Ka tan chuan boruak a ritin a harsa ve hle. A vawi 12 nan Malaysia Open nomawi ka chawi ta a, hei hian World Championship leh Asian Games atan phurna min pek ngei ka beisei. Tun ṭuma ka khingpui nen hian kum 10 chuangin kan inthlau a, player chhuak thar ṭha tak tak an awm zel avangin inelna a hautak zel a ni," tiin a sawi.