LeBron James-a'n Lakers a pan

Basketball star LeBron James chuan kum li chhung atan Los Angeles Lakers a pan. James hian Cleveland Cavaliers tana a contract neih lai a hmang zo a, Lakers nen an inremna hlut zawng hi pound maktaduai 116 a ni.

Kum 33 mi James hi Cavs tan a contract chu June thla khan a tawp a, July a rawn her chhuah rualin free agent a ni. Khawvel basketball player ropui ber ang hiala mi tam takin an ngaih James hian khawi lam nge a pan dawn tih chu mi hriat châk a ni a, tunah chuan chhanna pekin an awm ta.

Cleveland Cavaliers aṭanga bul ṭantu James hian Miami Heat tana nomawi vawi hnih a chawi hnuah 2014 khan a pianna ramah a kir leh a, Cavs hi 2016 khan NBA champion nih puiin, kum 52 chhung zet nomawi lian tham chawi loa an awm tawhna record chu a thai reh - an khuaah ngei chawimawina nopui a dawm thei a ni.

Cavs a hriat reng tur thu sawiin James chuan, "Season li chhung hun duhawm kan hman tawhna vangin Northeast Ohio chungah lawmthu ka sawi a, engtik lai pawhin helai hmun hi ka in a ni reng ang," tiin Instagram lamah a tarlang.

NBA Most Valuable Player atana vawi thum thlan tawh James hian a player ngaihsan Michael Jordan hnung zuiin jersey number 23 a ha ṭhin a, a chhuahsan tak Cleveland Cavaliers pawhin he thil hi an hriat sak. Cavs neitu Dan Gilbert chuan an team jersey number 23 chu midang hak theih tawh loh tura an dah tur thu a sawi zui ve bawk!

Hlawhtlinna ropui a chanpui miau avangin James chungah Cavs an lawmna a tawp thei lo. Gilbert chuan, "James leh a chhungte an kal leh zelna turah duhsakna kan hlan. NBA champion kan nih khan Northeast Ohio mipui min tipumkhatin rah ṭha a chhuah a ni, Cavs jersey 23 chu midang hak tawh loh tura dah a ni ang," tiin a sawi.