Germany leh Argentina te hnung zuitu Spain

Spain-in kumin FIFA World Cup last 16-ah team 32 zinga ranking hniam ber Russia an hmachhawn a, quarterfinal lut chianga dah an ni. Amaherawhchu inelna thlengtu Russia-in an thiamna, vanneihna leh mipui ṭanpuina hmangin 2010 champion La Roja an pet chhuak. Fernando Hierro hote hian champion lai Germany, Lionel Messi telna Argentina leh Cristiano Ronaldo telna European champion Portugal hnung an zui a ni.

Luzhniki Stadium-ah Pathianni zan khan Spain-in minute 12-na lekah Sergei Ignashevich own goal hmangin hma an hruai a, Russia tan Gerard Pique handball vanga an penalty hmuh chu Artem Dzyuba chuan minute 41-naah goal-ah a chantir a, extra time thlenga goal luh belh tawh loin 1-1 in a tawp.

Penalty shootout-ah Igor Akinfeev chu Russia chhandamtu a ni a, Koke leh Iago Aspas te penalty a dan sak a; Russia aiawha pen chhuak Fedor Smolov, Ignashevich, Aleksandr Golovin leh Denis Cheryshev ten khung vekin 4-3 in hnehna an chang.

Own goal upa ber

Stanislav Cherchesov-a hote bul ṭan dan a fuh tawk lo a, veteran defender Ignashevich-a'n ball thlir loin Spanish defender Sergio Ramos a bi tum a, ball kalin a ke a per leh si avangin Russia-in goal an chhuah.

CSKA defender hi kum 38 leh ni 352 a upa niin FIFA World Cup-a own goal khung upa ber a ni a. Iganshevich hian Honduras goalkeeper Noel Valladares-a'n kum 37 leh ni 43-a upa nichunga kum 2014-a France laka record duhawm lo a lo siam tawh chu a khum a ni.

Tawnhriat nei ṭha chesual

Russia-in ṭan phat aṭangin Spain chelh tumin tlarhnungah defender panga an rem a, player dang pawh hi an position tak chu defender ni lo mah se an tih chu a inang vek–La Roja goal khung tur venhim a ni.

Amaherawhchu goal an chhuah takah chuan nawr let a ṭul a, an vannei tel bawk. Spain tana vawi 102 inlanna chiah Gerard Piqué-a'n Russia striker Dzyuba tauh chu a kutin a dang a, Barcelona defender chetsual hi Dzyuba hian Spain hrem nan a hmang.

Khelh dan awmze nei

Russia an tumah an chiang a, inkhelh banah pawh keeper Akinfeev chuan 'penalty thlen kha kan beisei a ni' tiin draw-ah an lungawi thu a sawi.

Spain erawhin hun pangngaia chak tumin attacking player pathum Andres Iniesta, Iago Aspas leh Rodrigo te bench aṭangin an dah lut a, an goal nawrah ziaawm mah se Russia keeper dan theih loh turin a pet thei lo.

Fernando Hierro hoten vawi 1,006 zet ball an inpe kual a, hetihlai hian Russia erawhin vawi 204 chiah ball an in pass. Luzhniki Stadium-a Spain in pass zat erawh Russia-in World Cup hnuhnung palia an ball an in pass zawng zawng aiin vawi 21 chauhin a tlem.

Amaherawhchu Spain-in a hmawr bawk tur a nei lo a, ball chang tam mah se an tlarhma a bil avangin Russia tlarhnung chhah tak an su nghing lo. Stanislav Cherchesov-a'n bench aṭanga a luhtir pali zinga pahnih Smolov leh Denis Cheryshev te chu penalty pet lut zinga mi an ni a, Russia hi vanneih vang ringawta chak an ni lo.