St Stephen's College-in Mamata an sawmna sut TMC-in BJP leh RSS te inrawlhah an puh

New Delhi-a St Stephen's College chuan August 1-a an event buatsaiha tel a, zirlaite nen inkawmna hun nei tura West Bengal Chief Minister Mamata Banerjee-i an sawmna chu an sut leh.

Banerjee-i party, Trinamool Congress (TMC) chuan St Stephen's College-in Banerjee-i an sawmna an sut leh chungchangah BJP-RSS chu inhnamhnawihah an puh. St Stephen's College principal chuan an hun buatsaihah West Bengal CM sawm chungchanga phalna a pek chhuah duh tak loh avangin he sawmna hi sut a ni leh ta a ni.

TMC national spokeman leh Rajya Sabha-a an party hruaitu, Derek O'Brien chuan Mamata Banerjee-i chu ṭun hnaiah Chicago leh China-ah te thu sawi tura sawmna chu cancel a lo ni tawh a, tunah St Stephens ami cancel a ni leh ta a ni, a ti. BJP leh RSS te chuan Mamata-i chu ngai mawhin, a ṭawng chhuak tur ven tumin theihtawp chhuah mah se an ngawih tir reng thei dawn lo a ni, a ti. Banerjee-i hi ruahman lawk angin Delhi-ah a kal dawn tho a, July 31-a Catholic Bishops Conference of India huaihawt "Love your Neighbour" conference-ah khuallian a ni dawn nin O'Brien chuan a sawi.