Denmark lakah Croatia an vannei Penalty pet nawn ngam Modric

Croatia captain Luka Modric chuan extra time-ah penalty aṭanga chakna goal khung theihna hun ṭha an neih chu Denmark keeper Kasper Schmeichel-a'n a dan sak a, Real Madrid midfielder hian penalty shootout-ah pet nawn leh sakin a pet goal tawh a, hnehna an chang bawk.

Nizhny Novgorod Stadium-ah Denmark-in bul ṭan ṭhain Martin Jorgensen chuan minute khat pawh tling loah goal a khung nghal a, Croatia-in Danish midfielder Martin Delaney tihsual hmang ṭangkaiin Mario Mandzukic-a'n minute linaah siphurh a sut nghal.

Goal lut hma mah se goal dang hmuh tur a awm chhunzawm lo a, penalty hmanga chak zawk zawn niin Croatia 3-2 in an chak. Vatreni hian quarterfinal-ah inelna thlengtu Russia chu Inrinni zan dar 11:30-ah an hmachhawn ang.

Vanneih leh huaisenna

Pathianni zanah rinkai Croatia aiin Denmark an che ṭha zawk a, an khelh dan thlirin chak an phu zawk bawk.

Goal nawr na lo zawk Croatia-in goal khung theihna chance an nei ṭha thung. Extra time-ah winger Ante Rebic chu keeper Kasper Schmeichel a bum hnuah Martin Jorgensen chuan titluin penalty a hlawh chhuak. Nigeria lama penalty khung tawhtu Modric rawn ding chhuakin Schmeichel-a'n a dan sak.

Penalty pet a ṭul a, a pettu lam aiin keeper an langsar. Croatia keeper Danijel Subasic-a'n Denmark thiampuipa Christian Eriksen pet chu a dan sak. Denmark keeper Schmeichel-a'n Croatia midfielder Milan Badelj a dang chhunzawm.

Denmark tan captain Simon Kjaer leh Michael Krohn-Dehli ten an khung a, Croatia tan substitute Andrej Kramaric-a'n khungin captain Modric chu a vawi thumnaah huaisen takin a rawn pen chhuak leh a, Schmeichel-a'n a dang nawn tawh lo.

Croatia keeper Subasic-a'n Lasse Schone leh Nicolai Jorgensen te penalty pet a dang a, Schmeichel-a'n Josip Pivaric pet dang mah se Ivan Rakitic pet a dan theih tak loh avangin Denmark an tla a, Croatia an vannei thung.

Croatia coach Zlatko Dalic chuan, "Luka hian captain mawhphurhna a la ngam a, amah duh thlanna ngeiin penalty shootout-ah a pet nawn lehin a pet goal a, player ropui tak a ni a. Penalty vawi thum dangtu Subasic hi tun inkhela kan hero a ni," tiin Modric leh keeper a fak.

Schmeichel a thlir dan

Denmark keeper Schmeichel chuan, "Tumah ka dem lo. Ka tan chuan penalty pet ngam tura huaisenna neia pen chhuak te kha hero an ni," tiin man of the match a thlan chuan goal khung lo player-te a fak.

Leicester City keeper hi a pa Peter Schmeichel chuan a hmun ngeiah enin Manchester United legend hian a fapain penalty pet a dang lai hi a chhuang tih leh a lawmpui tih a chetziain a lantir bawk.