Murray a inhnukdawk

Nizan aṭang khan Wimbledon khelh ṭan a ni a, vawi hnih champion tawh Andy Murray chu set nga khel tura a la inpeih tawk loh avangin a inhnukdawk. Britain mipui ten kumin chu an player ṭan rawn ber mai inkhel an hmu thei dawn ta lo a ni.

World number 1 hlui Murray hi a khel bawr na vangin kum khat deuh­thaw a chawl a, June thla khan grass court inelna dang Queen's Club Championship-ah inlan mah se beisei angin a la khel chhuak lo.

Kum 31 mi Murray chuan, "Ka tan chuan a la hma lutuk a ni. Wimbledon aṭanga inhnuh­dawh thu sawi hi chu ka tana thil hrehawm leh na tak chu a ni chiang hle. Chutihrualin kan inrawn khawm hnuah set nga khel tur chuan ka la inpeih tawk lo a, hun rei lo te ka la nghah a ngai," tiin a sawi.

Britain tlangval Mur­ray hian 2013 leh 2016 khan Wimbledon title a la tawh a, kuminah hian inlan tumin a hming pawh a pe lut hman - French tlangval Benoit Paire nen inkhel tura ruahman ni mah se a ti hlawhting thei ta lo a ni.