Verstappen hun a thleng ve ta

Max Verstappen chuan Red Bull car khalh chung ngeiin an hmunpui Austrian Grand Prix-ah hnehna a chang ta. Pathianni zan Formula 1 intlansiakah cham­pion lai Lewis Hamilton chuan 2016 hnua a vawi khat nan intlansiak a tlan tluan thei lo a, Formula 1 championship lama a hmahruaina chu Sebastian Vettel lakah a hloh zui bawk.

Kum 20 mi Verstappen hi tun season chhungin a chak vawi khatna a ni a, car intlansiakna sang berah hian ṭum li a chakna chiah a ni nghal bawk. Pahnihna chu Kimi Raikkonen niin, Ferrari driver pakhat zawk Vettel chu pathumna a ni thung.

Dutch driver Verstappen chuan, "Championship lamah point hmuh kan mamawh em em laia hnehna ka chang thei hi a lawmawm bik hle. Ṭum dang ang lo takin tyre hman chungchangah fim­khur a ngai­in a harsa hle, mimal thawhrah ni loin team ṭan­rual­na vanga chak thei kan ni," a ti.

World champion vawi li ni tawh Vettel-a'n parukna aṭang­in bul a ṭan a, a tan pa­thumna nih hi result chhia a ni lo. German tlangval hian tun season intlansiak vawi kua awm tawh aṭanga point 146 hmuin hmahruaitu a ni ta a, a dinhmun erawh a la him lo hle - pahnihna Hamilton nen an in­thlauhna chu point khat chiah a ni.

Tun season chhunga vawi thum hnehna chang tawh Hamilton erawhin a ṭum fuh loh ni a tawng. Palina dinhmun a luah laiin a car in buaina a tawk tawh a, lap 71 tlan tur zinga lap 62 chu tlan thei mah se a tawp lam lap kua erawh a tlin tawh lo.

Formula 1 season kal laiah in­tlan­siak vawi 21 awm tur zinga pakua an tlan tawh a, a leh pek atan July 6 hian Silverstone tlankawngah British Grand Prix an tlan leh ang.