Hmalam hun sawi duh lo Ronaldo

World Cup aṭanga tla hlim Portugal captain Cristiano Ronaldo chuan a international hma hun sawi hun a nih loh thu a sawi. Portugal hi last 16 aṭangin Uruguay-in an pet chhuak a, kum 33 mi Ronaldo hian ram tan inkhelh a chawlhsan tawh mai ringtu an tam hle.

Mahse, Portugal coach Fernando Santos chuan Ronaldo chu World Cup 2022 thleng pawha a inkhelh a la beisei thu a sawi a, "Player naupang zawkte pui tura a awm zel ka beisei," a ti.

Ronaldo chuan, "Captain ka nihna angin player, coaching team leh staff-te chungah lawmthu ka sawi a, an hnathawh a ropui takzet. Tun hi ka chungchang thu sawi hun tur a ni lo," tiin a hma hun a sawi duh lo.

Real Madrid forward chuan quarterfinal lut lo mah se an hnathawhah an hlim thu sawiin, "Ka hlim em em a, rilru thlamuang tak chungin Russia hi kan chhuahsan a ni. He team hian player ṭha tak tak leh theihna nei sang tak tak a kawl avangin khawvela team ṭha ber pawl a nih chhunzawm zel ang.

"Inchhuang tak chungin World Cup kan mangṭha a, he Portugal team hian nomawi tam tak a chawi chhunzawm zel bawk ang. Inelna pumpui kha thlir ila, kan hnathawhah khan kan lawm tur a ni," tiin a sawi.