Team huaisen Japan ngamtu Belgium

Japan-in World Cup-ah a tikimtu mai an ni lo tih lantirin game hmuhnawm min entir mah se Belgium lakah an ṭang tlang zo lo a, 2-0 a hma an hruai hnuah 3-2 in an tlawm.

Blue Samurai tan Genki Haraguchi leh Takashi Inui ten second half ṭantir minute nga chhunga goal an khung avangin an chak dawn niin a lang hman a, mahse Roberto Martinez substitution siam chu engkim thlak danglamtu a ni.

Jan Vertonghen-a'n si phurh sutna goal a khung hnuah Martinez-a'n bench aṭanga a tlan luhtir Marouane Fellaini leh Nacer Chadli ten goal khat ve ve an khung chhunzawm a, 3-2 a hnehna changin last 16 an lut.

Japan-in a vawi khat nana quarterfinal luh an tumna a thamral a, 'Golden Generation' tih meuha hming an pek Belgium-in World Cup nomawi an hnaih zel thung–an hmaa awm erawh Brazil an ni tih theihnghilh loh a ṭha!

Hei le Japan
Team pahnih intawn hma hauhin Belgium chu mi tam zawkin chak tura an dah a ni a, uluk taka Japan inkhel en tawhtu tan erawh Asian team hi namnul chi an ni lo tih chu thil chiang a ni.

Blue Samurai player an nung ṭha a, an tlan tam a, an taima a, an thawkrim em em bawk. Goal khung loa chawlhlawk hman a nih hnuah Japan chu goal khung hmasa zawk a ni a, Belgium player an hawihai.

Minute 48-naah Gaku Shibasaki ball pekluh chu Belgium defender Jan Vertonghen tan dan theih tur ni mah se a khawih fuh miau loh avangin he ball um luttu Genki Haraguchi chuan box sir aṭangin goal sirah a pet lut.

Japan-in an la duhtawk mai lo. Goal hmahruai an khung aṭangin minute li a liam hman chauh a, Shinji Kagawa-a'n a thiam thil a lantir hnuah Inui chuan yard 25 vela hla aṭangin ṭha zetin a pet lut–Belgium goalkeeper ṭha Thibaut Courtois tan meuh pawh dan a harsa.

Martinez & substitution
Japan-in second half ṭan tirah goal hnih an khung a, team dang ang chu nise tlarhnung chiah ngaihtuah tawh hun a ni.

Mahse, Poland laka an tlawm ṭuma discplinary record hmanga an tlang theih thu hriaa a naute ball in pass kual tirtu Nishino-a'n a thusawi-a ding nghet lo nih a duh lo.

Japanese coach hian, "Mipui laka thupha chawi nan game hmuhnawm kan pho chhuak ang," tiin inkhelh hmain a lo sawi tawh a, Red Devils goal-ah an nawr chhunzawm. Goal hlawh chhuak zawk erawh Belgium an ni.

Belgium boss Roberto Martinez-a'n minute 65-naah player lian lo Dries Mertens leh Yannick Carrasco a la chhuak a, feet ruk chuanga sang player pahnih Nacer Chadli leh Marouane Fellaini a luhtir. Red Devils-in ball kang an uar sawt a, player palian nei tam lo Japan an talbuai sauh thung.

Golden Generation!
Belgium-in goal an zawng rei lo. Minute 69-naah Vertonghen-a'n a tihsual thup nan Japan ball petchhuah fuh tawk lo chu si phurh sut nan a tauh lut a, Tottenham Hotspur defender a vannei a, Japan keeper Eiji Kawashima-a'n tan en liam mai lo chu tih theih a awm lo.

Belgium an phur sawt a, goal khat an khung hnuah an si phurh sut zo turin hun an duh rei lo. Goal an khung aṭanga minute nga hnu lawkah Fellaini a inlar ve leh a, Manchester United midfielder hian Japanese player te tauh phak loh ball chu si phurh sut nan a tauh lut.

Japan an zam phah lo. Hnehna chan theih beiseiin Belgium goal-ah an nawr chhunzawm a, substitute Keisuke Honda freekick ṭha zet chu Courtois-a'n a dan sak.

Second 30 chiah a awm tawh tihin Blue Samurai-in corner an hmu a, Hondo ball pet chu Belgium keeper Courtois-a'n manin Kevin De Bruyne tan lirh sak nghalin Manchester City midfielder hian chak takin a khalh chhuak nghalin Thomas Meunier a pe a, PSG right back ball pek chu Lukaku-a'n a dummy hnuah substitute Chadli-a'n chakna goal khung nan a hmang. Goal ropui hian Belgium chu quarterfinal a hruai thleng a, he goal vek hian hun tawp thlenga huaisen taka beitu Japan a vel thung.

Eng nge an sawi?
Belgium boss Roberto Martinez chuan, "Japan khan an khel ṭha takzet a, fak an phu a ni. Counter-ah an bei ṭha em em a, sawiselna tur an awm lo a ni ber. Kan tan chuan fiahna ropui tak a ni a, he inkhel hi kan nihna tak pho chhuaktu a ni.

"Tun hi insawisel hun ni loin player-te lawmpui hun a ni a, a pawimawh ber chu kan chak hi a ni.

Belgium chungah rinna nghat zel rawh u," tiin fan-te a sawm.

Japan coach Akira Nishino chuan, "Hrehawm ka ti tak zet. Hma kan hruai a, kan chak zo si lo. Coach ka nihna angin mawhphurtu ka ni a, Belgium kan tluk lo a ni.

"Chhiatna rapthlak tak ang maiin ka thinlung hi a rum a, kan tlawm a ni tih hi ka pawm a ngai si," tiin a sawi.