Arsenal defender thar Sokratis

Greece international Sokratis Papastathopoulos chuan Arsenal tan hun rei tak cham tumin contract a ziak fel ta, Gunners a zawm hnuah a club thar chu Premier League club ṭha pathum zinga pakhat a nih thu a sawi chhuak nghal.

Borussia Dortmund defender manah Arsenal lamin an sum pek zat hi chiang taka tarlan ni lo mah se, pound maktaduai 17.7 ni a sawi a ni. Werder Bremen, Genoa leh AC Milan tan pawha khel tawh hian Dortmund tan season nga chhungin inelna hrang hrangah match 198 khelin goal 10 a khung.

Feet 6 leh 1 inch a sang Sokratis chuan, "Ka tan chuan engkim mai hi a hlu vek, EPL club ṭha pathum zinga pakhat tana hun ka hmang thei tur hi ka lawm hle a ni. Defender ka ni a, goal venhim chu ka hna niin, kan lama goal a luh lohna tur a nih dawn phawt chuan eng pawh ka ti mai ṭhin," tiin a sawi.

Arsene Wenger thlaktu Unai Emery-a'n Emirates Stadium a puan hnuah, ram tana match 79 khel tawh Sokratis hma hian Juventus defender Stephan Lichtsteiner leh Bayer Leverkusen aṭangin Germany goalkeeper Bernd Leno te a lalut tawh bawk a ni.

North London club hian season hmasa khan Dortmund aṭangin Pierre-Emerick Aubameyang leh German club tana a khelhpui tawh ṭhin Henrikh Mkhitaryan te an lalut tawh a, a club tharah Sokratis hi a mikhual dawn lo. Sokratis chuan, "Nitin chuan min be hran lo, mahse he hmuna kal tur hian min sawm ngun hle," tiin a ṭhian hluite a zawm thu a sawi.