Serena a hrang nghal

Serena Williams chuan Thawhṭan zan khan Wimbledon first round khelin Arantxa Rus chu 7-5, 6-3 in a hneh nghal. US Open champion Sloane Stephens erawh set la miah loin a chak lo nghal thung.

All England Club-ah 2016 hnua a vawi khat nan Serena a inlan a, beisei angin grass-ah inkhel chhuak nghal lo, unforced errors vawi 29 ngawt a nei–chutih rualin set hloh loa hnehna chan theih hi bul ṭanna ṭha a ni.

Wimbledon vawi sarih champion tawh Serena hi fa a neih vangin season hmasa khan a chawl reng a, a rawn kir hnuah a ranking a hniam avangin Grand Slam-ah seeded ni phak lo tur a ni. Mahse, Wimbledon buatsaih tute duhsakna dawngin kuminah hian seeded 25-na an nih tir a ni.

Inkhel dangah seeded palina Stephens chu world number 55 Donna Vekic lakah 6-1, 6-3 in a chak lo. Seeded pangana Elina Svitolina pawh world number 57 Tatjana Maria lakah 6-7 (3-7), 6-4, 6-1 in a tlawm ve bawk. Player langsar dang Caroline Wozniacki leh Venus Williams te erawh harsatna nei loin an tlang thung.