Federer leh Wawrinka ten bul ṭan fuh

Tennis tournament upa ber Wimbledon chu July 2 zan aṭang khan All England Club-ah khelh ṭan niin, champion lai Roger Federer chuan awlsam takin hnehna a chang a, tun hnaia beisei phak lo Stan Wawrinka pawhin chak tura rinkai zawk Grigor Dimitrov a hneh ve bawk.

August thlaa kum 37 tling mai tur Federer hian darkar khat leh minute 19 chhungin world number 57 Dusan Lajovic lakah 6-1, 6-3, 6-4 in hnehna a chang a, Swiss star hian kum dang ang bawkin vawi sarih a champion tawhna hmunah hian a match hmasa ber aṭangin inkhel a thunun hneh leh nghal hle.

World number 2 Federer hi a kum a tam deuh tawh a, tournament zawng zawngah pawh a inlan ngai tawh lo; French Open lamah pawh hmel a inlan lo. Centre Court-a a inkhel hi a nupui Mirka bakah a fanu phir Charlene Riva leh Myla Rose te leh a fapa phir tho Leo leh Leni ten an ṭawiawm leh a ni.

Grand Slam vawi 20 cham­pion tawh Federer hian a zawna season 20 nan Wimbledon a khel a, ani aia record nei ṭha an awm lo. Kuminah hian Stuttgart Open nomawi a chawi hnuah Halle Open final lut hlim chunga inlan a nih avangin inrintawkna a nei sang.

Wimbledon vawi riat cham­pion tawh Federer chuan, "Lajovic nen hian season hmasa khan kan intawng tawh a, kuminah pawh set hloh loin hnehna ka chang nawn thei hi a lawmawm hle," tiin a sawi. Wimbledon title vawi thum la tawh Boris Becker chuan Federer chu player ṭha bik a nih thu leh, game plan A-D thlengin a nei hiala a hriat thu a sawi ve bawk.

Stan a nghet

A khup hliam zai a nih hnu­ah Stan Wawrinka-a'n beisei a la phak lo a, chak ni hmel a hmu hleithei lo. Wimbledon-ah erawh Wawrinka a rawn inlar ta, Swiss star hian inkhel inhnehtawk takah seeded parukna Grigor Dimitrov chu 1-6, 7-6 (7-3), 7-6 (7-5), 6-4 in a hneh.

Season hmasa khan Waw­rinka hi a match hmasa berah Daniil Medvedev hneh loin a tla nghal a, a khup a hliam bawk. Kumin January thla khan Aus­tralian Open-ah a rawn kir chiah, mahse February thla khan a hliam ngai hi zai nawn leh a ni.

Tunah chuan Waw­rinka a dam chiang tawh a, inrintawkna a neih san leh tawh avangin Dimitrov a hneh leh thei ta. Chu­tihrualin Grand Slam vawi thum champion tawh hian Wimbledon-ah hian quarterfinal a la paltlang ngai lo a, kuminah beisei a nei sang ve ang.

Kum 33 mi Wawrinka chuan, "Ka thil tum ber chu match hmasa bera hnehna chan kha a ni. Grigor hi player hmachhawn harsa tak a ni tih chu ka hria, chak lo thei ka nihzia ka hriat avangin ka inbuatsaih nasa hle. Hnehna ka chan hian in­rintawkna min siam belh a, match lehpek atan theihtawp ka chhuah ang," tiin a sawi.

First round inkhel dangah nikum finalist Marin Cilic chuan a ball vuak na tak hmang ṭangkaiin Yoshihito Nishioka chu 6-1, 6-4, 6-4 in a hneh a; seeded 11-na Sam Querrey pawhin Jordan Thompson chu 6-2, 6-4, 6-3 in a hneh ve bawk. Tun hma lama final khel tawh Milos Raonic pawhin khawtual tlangval Liam Broady chu 7-5, 6-0, 6-1 in a hneh bawk a ni.