An duh chu ka hria - Kovac

Bayern Munich coach thar Niko Kovac chuan Thawhṭanni zan khan thuthar thehdarhtute a kawm a, club thuneituten amah an lak luh chhan chu hun rei zawk tlhira hlawhtlinna chan zel an duh vang niin a sawi.

Kum 46 mi Kovac chuan, "Hlawhtlinna chang tura beisei ka ni a, min lakluh chhan pawh a ni. Hna kan thawh ṭan hma aṭangin ka chanchin sawi a tam tawh hle a, kei hi mi chi hrang hrang awm tamna Berlin-a hun hmang tam tawh ka nih avangin boruak leng velah hi chuan ka buai lo," tiin boruak sang pawh a zawh tur thu a sawi nghal.

Hmalak dan tur sawi zuiin Croatian manager chuan, "Eng team pawhin a theih chuan inlak ṭhat an duh reng a, chutihrualin kei chuan ka neih sate hriatchian hmasak hi pawimawh ka ti. Player tin hian ṭha bikna an nei ṭheuh a, chumi chhawr chhuak tur chuan kan thawkrim hle ang," tiin a sawi.

Kovac hian tun hnaia German champion chhuahsan tur anga an sawi fo Robert Lewandowski nen an inbiak tawh thu a sawi a, season dang ang bawkin hlawhtling taka an thawhho theih a beisei. Poland captain hian season hmasa khan club leh ram tan match 58 a khelh aṭangin goal 59 ngawt a khung a ni.