Tluk der hrat Neymar an sel nasa

FIFA World Cup-a Brazil quarterfinal thlenpuitu Neymar chu khelmual chhungah che ṭha mah se mual chhungah tho uchhuak taka tluk der leh nat der avangin khawvel player manto ber hi an sawisel nasa.

Mexico boss-in a dem

Mexico coach Juan Carlos Osorio, "Football timualpho tu a ni a, player pakhat vangin hun rei tak kan chawlh phah a ni. Football inelna hi mipa inelna a ni a, an tider nasa lutuk hi a dik lo. Football hmel a ti bal a, naupang tak entawn tlak a ni lo," tiin Brazil an hneh loh zawhah a sawi.

Neymar hi field pawna a tluk laiin Miguel Layun-a'n ball a lak sak pahin a ngalrekah a rap tel a, Brazilian forward hi uchuak takin na tuarin a vial a, hemi hnu lawk hian a khel thei lehnghal.

Player langsar an bang lo

England striker hlui Alan Shearer chuan, "Neymar, duh tawk teh. Kan ning tawh," tiin tweeter-ah a ziak a. Newcastle striker hlui chuan, "A thiamna hi hai rual a ni lo. Engvangin nge hetiang thil hi a tih mai le?," tiin Brazil striker chet dan a hrethiam lo hle.

Germany striker leh coach hlui Jurgen Klinsmann chuan, "Layun khan a rap ngei a, amaherawhchu a uchuak deuh a ni," tiin a dem.

Aston Villa striker hlui Dion Dublin chuan, "Neymar-a chet danah hian ka lo zak a ni. Khaw­vela player ṭha ber zinga mi ni siin khelmualah a na derin a let tawp tawp mai a, a mak khawp mai. Insiam ṭha se inkhel chauh hi ngaihtuah teh se," tiin a sawi ve bawk.

A chhan pawh an awm

Premier League referee lar ṭhin Mark Clattenburg chuan, "Layun khan a rah luih avangin red card tur a ni," tiin a sawi a, Neymar hian uar takin vial mah se VAR hmangin en let a ni lo.

Brazil manager Tite pawhin, "An rap ngei a, screen-ah kan ka hmu a ni," tiin a chhan Neymar a chhan. Khawvel player ṭha pahnih Lionel Messi leh Cris­tiano Ronaldo te an awm tawh loh avangin thiamna vang ringawt pawhin Neymar hi en bik tur a ni a, khelmual chhungah che ṭha mah se nat der hrat vangin media leh mipui aṭangin a phu tawk fakna a dawng lo.