England – a lo thleng ngei dawn e (?)

England fan-ten, "A lo thleng ngei dawn e," tia World Cup nomawi hawn an tum thu an zaipuina aw a ring zual zel a, world champion ni tura Three Lions mamawh chu match thum chiah a ni ta!

Thawhlehni zan khan England chuan penalty shootout hmangin Colombia chu 4-3 in an hneh a, World Cup quarterfinal an lut. Team pahnih hian minute 120 chhungin goal khat ve ve an khung a, penalty hmangin a thiam pariat zinga tel tur chinfel a ni.

Three Lions tan Harry Kane chuan minute 57-naah penalty hmangin goal hmahruai a khung a, minute 90 thleng chu an chak dawn niin a lang hman. Mahse, Yerry Mina chuan hun pek belhah Colombia tan si phurh a sut a, extra time-ah pawh goal dang a luh loh avangin penalty pet a ṭul phah.

England tan Jordan Henderson-a'n penalty a chhuih luh loh kha chuan England an vanduai dawn niin a lang hman. Mahse Colombia tan Mateus Uribe chuan bar a pet per a, Jordan Pickford chuan Carlos Bacca pet ṭha zeta dang zuiin England an chak!

Beisei phak lo

Thawhlehni zana team pahnih intawn hmain beiseina neih thiam a harsa. England-in Tunisia leh Panama an hneh hnuah Belgium an ngam lo a, Red Devils lakah an player ṭhate an chawlh hahdamtir avangin Three Lions hian fiahna tak tak an la hmachhawn loah ngaih a ni.

Inkhelh hma lawkin Colombia tan James Rodriguez a inlan loh tur thu a chiang a, squad-ah pawh dah a ni lo. Hei hi England tan chuan ball pet ṭan hma hauha thawk huaina tham a ni a, Colombia fans tan hnualna tham a ni thung.

Colombia-in an khelh dan aṭangin an tharum ngah chhawr ṭangkai an tum tih a hriat a, game hmuhnawm tak aiin foul hmuh tur a tam zawk a, England-in game hmuhnawm an pho chhuak thei bik lo.

Goal awm loa chawlhlawk hman a nih hnu, minute 57-naah England-in penalty an hlawh chhuak a, Harry Kane chuan World Cup-a a goal rukna ni turin a khung. Mahse, Colombia tan Mina chuan hun pek belhah si phurh a sut a, defender nichungin Russia-ah goal thum a khung!

Thlan fuh Pickford

England-in World Cup squad an puan chian hmain Russia-a an goalkeeper tur chungchangah inhnialna a tam hle. Three Lions buaina ber chu tawnhriat ngah Joe Hart-a'n tun hnaiah beisei a phak lo a, Jordan Pickford, Jack Butland leh Nick Pope chu duh thlan tur an neih dang an ni.

Gareth Southgate-a'n Russia-ah Hart hruai tel a ṭulna a hre lo a, keeper tawnhriat nei tam lo Pickford, Butland leh Pope a thlang a, si ban nghak tura a number 1 chu World Cup hmaa ram tana match hnih chiah la inlan Pickford a ni!

Everton goalkeeper hian match hmasa lamah Tunisia leh Panama a hmachhawn miau avangin shot hlauhawm tia sawi tur hmachhawn a nei lo a, Belgium lakah fiahna a paltlang lo nia ngaih a ni bawk.

Colombia lakah erawh Southgate-a'n Pickford a thlan chhan hmuhtirin kan awm. Kum 24 mi goalkeeper hian yard 30 vel aṭanga Mateus Uribe goal shot ṭha zet chu ṭha takin a dan sak a, Bacca penalty a dan kha ennawn leh fo ṭhin tlak a ni.