Nadal leh Djokovic an chak

Rafael Nadal leh Novak Djokovic te chu tun hma lama an champion tawhna Wimbledon-ah an mikhual lo hle. Thawhlehni zan khan an match hmasa ber khelin harsa lo takin second round an inhlangkai.

World number 1 Nadal-a'n French Open nomawi a chawi hnua a match hmasa ber khelin Dudi Sela chu 6-3, 6-3, 6-2 in a hneh a, Spanish tlangval hian a match lekpekah chuan Mikhail Kukushkin a hmachhawn ang. Djokovic pawhin Tennys Sandgren chu 6-3, 6-1, 6-2 in a sawp ve bawk a, Serbian tlangval hian Horacio Zeballos lakah fiahna a hmachhawn leh dawn a ni.

Grass-ah Nadal

A zawna a season hnih nan Nadal-a'n grass court-a inbuatsaihna nei hmasa loin Wimbledon a khel a, nikum khan fourth round thleng mah se Gilles Muller a hneh lo. Grass-a tournament a khelh hman loh chhan hi a inkhelh thiamna hmun clay court-ah a inkhelh tam ṭhin vang a ni.

2008 leh 2010 kuma a champion tawhna hmunah Nadal hi rinkai ber chu a ni lo mai thei, Nadal hian tun hnaiah Wimbledon bikah hian world ranking-a 100 hnuai lam vawi li ngawt a hneh lo tawh. Tun ṭumah erawh Spanish tlangval hian world number 127 Sela lakah harsatna a tawk lo.

Grand Slam vawi 17 champion tawh Nadal chuan, "Wimbedon khelh hi chu a nuam dangdai hle, a bik takin Centre Court phei hi chu a hlu hle. Hnehna ka chan avangin second round atan boruak a ṭha chho zel turah ka ngai," tiin a sawi.

Djokovic a lar

Season hmasa khan Djokovic hi quarterfinal-ah a chak lo a, a kiu hliam vanga buai chhunzawmin season chawhnu lam zawng chu a inkhel thei lo. Kuminah rawn kir leh mah se beisei angin a la khel chhuak lo, world number 21 hialah tlahniam tawh mah se Sandgren lakah erawh a ṭhat dan takin a khel chhuak leh thei tawh.

Kum 31 mi Djokovic hi kuminah seeded 12-na a ni a, Wimbledon a khelh tawh china a dinhmun hniam ber ṭum a tawng. Amaherawhchu, a khel ṭha leh tawh hle - break point vawi 19 a hmuh tawh zinga pasarih chu chhawr ṭangkai theiin, set thumna an khelh laia a service vawi khat a hloh tih mai loh chu a nghet ṭha hle.

Serbian tlangval Djokovic chuan, "Ka khelh danah sawisel tur ka nei lo, chutihrualin service lamah erawh hmasawn zual ka la ngai. A bul ṭanna chauh a ni a, sang takah a hmawr bawk ngei tumin ka bei dawn a ni," tiin a sawi.