Sharapova a liam nghal

Tleirawl duhawm a nih laia ropuina a chan tawhna hmun All England Club-ah Maria Sharapova a inlan leh a, Russian nula hian tun hnaia a chanchin ṭha lo hliahkhuh tumin thapui thawh mah se a tawk lo - Vitalia Diatchenko hneh loin Wimbledon first round aṭanga vuak tlak a ni.

Thawhlehni zan inkhel dang­ah vawi hnih champion tawh Petra Kvitova a chak lo bawk. Player langsar dang Garbine Muguruza, Simona Halep leh Caroline Garcia te erawhin set hloh loin hnehna an chang thung.

Maria a tla

2004 champion Maria Shara­pova hi tun hmain Wim­ble­don bikah chuan vawi 14 a inlan tawh zinga a match hma­sa berah a tlawm ngai lo. Tun ṭuma a khingpui Vitalia Diatchenko lakah pawh harsa lutuk loa hnehna chang thei tura ngaih a ni.

Mahse, Court Two-ah ni­dang angin thil a kal fuh vek bik lo. Darkar thum leh minute sarih an inkhelh hnuah seeded 24-na Sharpova hi a hnam pui lakah hian 6-7(3), 7-6(3), 6-4 in a tlawm. Sharapova hian ni dang angin a ball vuak na tak la chhawr ṭangkai mah se tihsual a ngah a, point hnuhnung ber a hloh chhan pawh double fault a neih vang a ni hial.

Kum 31 mi Shrapova hian thla 15 hremna a hman zawh hnuah Grand Slam vawi nga a khel leh tawh a, beisei phak lo vekin final a la lut leh lo. World number 1 hlui chuan, "Clay-ah ka inkhel hnem lutuk a, grass court tournament khel loin ka inlan tawp, inbuatsaihna neih ṭhat tawk loh ka tuar a ni," tiin a sawi.

Kvitova pawh

Wimbledon vawi hnih champion tawh Petra Kvitova chu Aliaksandra Sasnovich lakah 6-4, 4-6, 6-0 in a tlawm nghal bawk a, world number 50 Sasnovich chuan hnehna a chan theih chhan chu rinkai lo zawk ni mah se inbuatsaihna a neih ṭhat vang a nih thu a sawi.

Kum 28 mi Kvitova-i'n tun season chhungin nomawi panga a chawi tawh a, kar hmasa mai khan Birmingham Open-ah hlawhtlinna a chan bawk avangin tun ṭumah hian champion tura rinkai a ni phak. Mahse, Czech Republic nula hian inrintawkna a nei thuk lo tih a hmuh theih a, set hnuhnung berah phei chuan game khat mah a la lo.

2016 khan Kvitova hi a chenna inah chemte hmanga beih a ni a, tennis a vuak thiamna a ban vei lam chu zai a ngai hial. A hliam a dam hnuah major tournament vawi ruk khel leh tawh mah se quarterfinal a la paltlang leh thei lo - inelna lian lo zawkah erawh a hlawhtling leh tawh thung.

Inkhel dang

Simona Halep-i'n French Open nomawi chawi chungin world number nih a phu zia a lantir a, Wimbledon lamah pawh seeded pakhatna nih a phu zia lantir nan Kurumi Nara chu 6-2, 6-3 in a sawp. Romanian nula leh Japanese player hi ranking lamah 99 ngawtin an inthlau a, darkar khat leh minute 18 an inkhelh hnuah a ṭha leh thiam zawk a lang chiang hle.

Angelique Kerber pawhin Vera Zvonareva chu 7-5, 6-3 in a hneh. German nula hian kum hnih liam ta khan he hmunah hian final a lut a, mahse Centre Court-ah Serena Williams a ngam loh avangin pahnihna a ni. Kuminah rinkai ber ni lo mah se Australian Open leh US Open lama a hlawhtlin tawhna chu belhchhah a tum ruh ang.

Champion lai Garbine Muguruza chuan a title humhim turin bul a ṭan fuh, Spanish nula hian khawtual nula wildcard hmanga inlan Naomi Broady chu 6-2, 7-5 in a sawp a, seeded parukna Caroline Garcia pawhin Belinda Bencic chu 7-6 (7-2), 6-3 in a hneh ve bawk.