Goal hnihin Kane a fal ta

FIFA World Cup last 16 khelh zawh a ni ta a, Golden Boot dawng turin England captain Harry Kane a dinhmun a ṭha ber. Tottenham Hotspur striker Kane hian goal ruk khung tawhin amah hnaih bertu Romelu Lukaku chuan goal hnihin a pha lo a, hetiang zat bawk khungtu Cristiano Ronaldo chuan Russia ram a chhuahsan tawh bawk.

A tehfung

Goal khung tam ber hnenah Golden Boot chawimawina pek a ni ṭhin. Goal khung zat inang player pahnih emaw a aia tam an awm a nih chuan assists (ṭhiante goal khung tur siam sak) zat chu en leh tur a ni a, hetah pawh hian chinfel theih a nih loh chuan minute khel tlem zawk hnenah Golden Boot chawimawina hi hlan tur a ni.

Kum 2010 khan Germany forward Thomas Muller, Spain forward David Villa, Netherlands midfielder Wesley Sneijder leh Uruguay forward Diego Forlan ten goal nga vek an khung a; assists vawi thum neitu Bayern Munich forward Muller hnenah Golden Boot chawimawina a dawng.

Goal khung tura piang

Kum 24 mi Harry Kane hian 2014-15 season khan PFA Young Player of the Year chawimawina a dawng a, hemi ṭum hian Premier League-ah goal 21 zet a khung a. Tottenham forward hian season khat chefuh ringawt a ni lo tih lantirin 2015-16 season khan goal 25 a khung a, 2016-17 season-ah goal 29 khung lehin season hnih chhung a zawnin top scorer a ni.

Season liam ta pawh khan Kane hian goal 30 zet a khung tling amahaerawhchu league match-a a khung tam ber ṭum hian amah aia khung tam Mohamed Salah a awm avangin top scorer a ni lo. Amaherawhchu, Kane hian season li chhungin Premier League-ah goal 20 a khung tling vek a, famkim lohna nei bawk mah se goal khung thei bik a ni tih chu a chiang hle.

England-in striker ropui Alan Shearer thlak nan Michael Owen an nei a, Liverpool sriker hlui thlak nan hian Wayne Rooney rawn awm lehin Manchester United legend thlak nan Kane a rawn awm leh ta. Kum 24 mi lek ni mah se Kane hian captain mawhphurhna a chelh ngam a, hun pawimawh goal pawimawh a khung ṭhin a, England innghahna ber niin ram tan vawi 27-ah goal 19 a khung.

Kane elpui ber tura lang chu Premier League lama a elpui tho Romelu Lukaku a ni a, Belgian striker hian goal li a khung tawh. Ani pawh hi Kane ang thoa goal khung tura piang tih theih a ni a, Lukaku hian Premier League hnuhnung pangaah goal nga a khung tling vek. Manchester United striker hi kum 25 chauha upa ni mah se ram tan match 72 zet inlan tawhin goal 40 a khung tawh a ni.

Rin loh lam aṭangin

Kum 1978 kha Argentina striker Mario Kempes leh 1982-a Italy striker Paolo Rossi te chuan first round-ah goal a khung lo a, amaherawhchu inelna zawh meuh chuan goal ruk ve ve khungin top scorer an ni.

Tun ṭumah pawh hian France tana goal thum khung tawh Kylian Mbappe leh Uruguay forward Edinson Cavani te hming dah ṭhat a la thiang lo a; Luis Suarez hian goal hnih chauh la khung mah se amah ang bawka goal hnih khung tawh Antoine Griezmann te pawh hi chetfuh niah chuan hattrick siam thei reng an la ni.

Heng bakah Russia-in khawvel leh Spain an barakhaih theih nan forward Artem Dzyuba chuan goal thum a khung tawh a, vanneih a kal tluan chuan Zenit Saint Petersburg striker hi top scorer a ni nulh thei bawk.