Poland coach a bang dawn

Group stage pawh paltlang loa World Cup an mangṭha hnuah Poland coach Adam Nawalka chu tun thla tawpah a hna aṭanga a chawlh tur thu puan a ni.

Kum 60 mi manager hi World Cup zawh ruala contract tawp tur chiang sa a ni hrim hrim a, Polish FA chuan contract thar zawrh loa kal tir mai turin thutlukna an siam.

Poland Football Association hotupa Zbigniew Boniek chuan, "Ruahmanna thar duang chungin national team kalphung thar kan duang dawn a ni," tiin an coach hnena contract thar an zawrh loh chhan a sawi.

Player a nih laia Poland tana vawi 34 inlan hman Nawalka hian World Cup aṭanga an tlak hlim khan an result chu a mawhphurhna a nih thu a lo sawi tawh a, "Fan-te beisei kan phak lo a ni," a ti.

Poland hi Group H-ah awmin an match hmasa pahnihah Senegal leh Colombia an ngam lo a, match hnuhnung berah Japan hneh mah se Blue Samurai nena an inkhelh hma hian last 16 an lut thei lo tih a chiang tawh.