Germany-in Low an la ring ngam

Germany chuan 2014 FIFA World Cup champion puitu Joachim Low chungah zahngaihna an lantir a, Russia rama first round-a tlakpuitu coach hi an la ring chhunzawm dawn.

Low hian kum 2006 aṭangin head coach hna hi a chelh ṭan a, thla liam ta mai khan kum 2022 thleng contract a pawtsei. Amaherawhchu, kum 1938 hnua a vawi khat nan Germany-in World Cup first round an paltlang zawh loh avangin Low hi a hna chelh lai chan thei dinhmunah a ding a, tunah erawh Die Mannschaft a enkawl zel dawn tih nemngheh a ni.

Kum 58 mi Low chuan, "Kan result ṭhat loh vanga sawiselna nasa tak kara DFB-in min rinngamna leh fuih phurna hi lawmawm ka ti. Tunah chuan team thar din turin ka theihna zawng zawng ka chhuah ang. Hun chu a duh dawn a, amaherawhchu September thlaa international match kan khelh leh hunah chuan ngai kan awh leh tawh ang," tiin a sawi.

Russia ramah Low che ṭha tawk lo mah se Germany hi Brazil 2014-a a champion pui bakah South Africa 2010-ah te pathumna a nih pui a, Euro 2008-ah pahnihna a nih bakah Euro 2012 leh 2016-ah te semifinal an lut bawk.

DFB president Reinhard Grindel chuan, "Kan ngaihdan thlang taka kan sawi ho hnuah Jogi Low ngei hi team kaihruai tura kan la duh ber chu a la ni," tiin team enkawltu tur dang melh a la hun loh thu a sawi.

Team director Oliver Bierhoff chuan, "Jogi Low-a'n min la ho tur hi a lawmawm. Kum 14 chhung team tan theihtawp a lo chhuah tawh a, tunah pawh hian phurna nasa tak a la nei a ni. Tunah chuan kan team kalphung kan thlak danglam ang," tiin coach ngai nei chungin kal dan erawh an thlak tur thu a sawi a, Low hian coach hna a chelh hma hian assistant coach hna kum hnih a chelh tawh a ni.