Mizoram leh Manipur an chak
Santosh Trophy NorthEast Zone qualifying round chu nimin aṭang khan khelh ṭan a ni a, group B-a team ṭha pahnih Mizoram leh Manipur ten hnehna an chang.
Khuman Lampak Stadium, Imphal-ah Mizoramin Tripura 1-0 in an hneh a, goal awmchhun hi Lalhriatpuia'n a khung. Inkhel dangah Manipur-in Salam Johnson Singh goal hnih leh Sudhir Laitonjam goal hmangin Nagaland 3-0 in an hneh.
Mizoram XI
Mizoramin keeper atan tawnhriat nei ṭha F. Lalmuanawma an hmang a, captain Lalrinchhana Tochhawng leh Lalmuanawma te tlarhnungah inkawpin F. Malsawmzuala leh Lalremruata te mual sirah a awm.
Midfield-ah Lalnuntluanga Bawitlung, K. Lalrinfela leh Eric Remruatpuia Chhangte te an awm a, tlarhmaah Hriatpuia a mal tlat. HK Lalhruaitluanga leh F. Lalnuntluanga ten mualsir aṭangin Hriatpuia an thlawp.
Goal khat
Mizoram an khel ṭha hret a, Lunglei tlangval Tluanga'n chance ṭha hmasa hlahin keeper Ranesh chauh a hmachhawn hnuah a khung lo. Mual sira awm Ngopa rawlthar Tluangtea a hmuhnawm a, goal erawh a keng tel bik lo.
Minute 42-naah Mizoramin goal an khung a, dinglam aṭanga Lunglei tlangval Hruaitea cross chu Hriata'n goal-ah petin Tripura defender-in an dang hman. Hemi per hi Farkawn tlangval Hriata'n chiang takin a pet goal.
Mizoramin Manipur result hre sain an khel a, goal tam zawk khung belh tumin second half ṭan chiahah Vanlalthanga leh Lalsawmzela te an luhtir. Amaherawhchu second half-ah hian team pahnih an inhnehtawk a, chance ṭha tiha sawi tur awm tawh loin goal a luh belh tawh lo.
Goal difference
Group khat aṭangin team pakhat chiahin final round an lut dawn a, tuna a lan danah chuan Mizoram leh Manipur te hi hmunruak inchuh turah a ngaih theih. Team ṭha pahnih hi match hnuhnung bera an inkhelh dawn chauh avangin goal difference thlengin a pawimawh dawn.
Mizoram hian November 30, Thawhlehni tlai dar 2:30-ah Nagaland an hmachhawn dawn a, Manipur hian chawhma dar 9:30-ah Tripura an hmachhawn thung ang.
Group match hnuhnung ber hi December 2, Ningani tlaiah khelh a ni dawn a, goal difference nei ṭha zawk tan final round lut turin draw a tawk ang. Match khatna khelh zawhah Mizoram aiin Manipur dinhmun a ṭha zawk.
Eng nge an sawi?
Mizoram manager K. Lalenghluna chuan, "Point thum kan hmuh avangin kan lawm a, goal khat chauh kan khung erawh pawi kan ti. Nivia Ashtang ball hman tura hriattir kan nih laiin MPL-ah pawh kan pet duh loh Nivia Antrix kan hmang a, ball a ting nasat avangin kan harsat. Inkhelhna hmun hi natural turf a ni a, artificial grass-a khel ṭhin chuan harsatna kan nei leh bawk," tiin Vanglaini a hrilh a, Nagaland an hmachhawn huna insiamṭhat a inbeisei thu a sawi.
Mizoram coach Samson Rameng-mawia chuan, "Chak hrim hrim a ṭha a, chutihrualin insiamṭhatna tur a awm. Kan theihna angin kan la khel chhuak lo. A êng zawnga thlir chuan Tripura-in chance an nei lo a, kan keeper leh defender-ten hna tih tham an nei lo," tiin a sawi.