Mizoramin Kerala an lehthal

Hero Senior Women's National Football Championships-ah Mizoram chuan nimin khan inelna thlengtu Kerala lehthalin 3-2 in hnehna an chang.

Group G inkhel dangah seeded Madhya Pradesh-in Uttarakhand 4-1 in an sawp. November 30, Thawhlehni tlai dar 2:30 hian Mizoram leh Madhya Pradesh-te an inkhel dawn a, a chak zawk hi quarterfinal lut turah a ngaih theih ang.

EMS Corporation Stadium, Kozhikode-a inkhelah Mizoramin Grace Lalrampari hmangin minute 39-naah goal hmahruai khung mah se Athulya K V leh Femina Rag Valappil-te hmangin first half-ah vek an lehthal.

Mizoram team chak lo theia an din laiin first half-a penalty hlahtu Elizabeth Vanlalmawii'n minute 79-naah si phurh sutna goal a khung a, injury time-ah Lalnunsiami'n chakna goal a khung. Group khat aṭangin team khat chauh an tlin dawn avangin Mizoram tan point thum hi a hlu hle.

Mizoram coach Lalrozara chuan, "Inelna thlengtu an nih miau avangin ṭantu an nei ṭha a, khelh an harsa. Chutih rualin kan khel ṭha zawk a, a tawpa vannei hram ni mah ila chak phu zawk kan ni," tiin a sawi a; mipa team ang thoin natural grass leh Anthrix ball an hman vanga harsatna an tawh thu an sawi bawk.