Zo Keite 'NT-a' thlantui a chhuak hman lo!
Mizo mipui nghahhlelh LPS Fight Night 2 chu neih a ni ta a, NT Lalbiakkima'n a lo sawi lawk tawh angin IBA intercontinental title a kawl lai chu a humhim a, round hnih bak a mamawh lo!
Mizo boxer langsar bera chhal ngam NT-a hian Inrinni zan khan round hnihna lekah harsatna nei loin a khingpui Gerttipong Kumsahwat hi technical knockout hmangin a hneh a, Mizo boxer hmaah Thai tlangval hi dawl zawrin a zawr a ni ber.
NT-a chuan, "He khawvelah awm ve tawh lo mah se ka pa ka hre reng a, a tan he belt hi ka hlan a ni. Min ṭan tlattu Mizo mipuite avangin he belt hi ka hlawh chhuak tih ka hria a, an chungah ka lawm. Engtiklai pawha min puitu Dr. Lamuanpuia (MF &AS) leh ka nu Zothanpuii te chungah lawmthu ka sawi bawk," a ti.
Beisei phak lo
Dawrpui Multipurpose Hall-a inhnekah ṭan phat aṭangin NT-a'n a game pangngai a khel a, Thai boxer a attack nghal chat avangin amah aia tawnhriat nei ṭha zawk boxer a che thei lo a, awlsam takin NT-a a chak.
Mizo mipuiin inhnek hmuhnawm zawk hmuh an beisei a, mahse, NT-a a hmuhnawm em em rualin a khingpui Kumsahwat-a'n beisei a phak lo a, a khaikhawmna awlsam ber chu 'boxer pahnih an inthlau' tih hi a ni.
NT-a coach Lalmuanpuia chuan, "Round nga kan ti a, mahse, beisei aiin result a awm hman. NT-a tan fiahna a tling tawk loah ka ngai a, world title thlenga beiseina kan neihpui a nih avangin boxer ṭha zawk hmachhawn a mamawh tawh a, NT-a theihna tak tak kan hmu hman lo zawk a ni," tiin Vanglaini a hrilh.
A ropui e
NT-a promoter, Marine Pro Boxing Promotions neitu Devraj Das chuan Fight Night chu a beisei aia a hlawhtlin thu sawiin, "LPS chhungkua inpeknain fak a phu a, hetiang taka fight hlawhtling anmahni vanga kan buatsaih thei hi ka lawm a ni.
"NT-a hi Thailand emaw Phillipines emawa training a neih theih dan tur buaipui mek a ni a, tunah hian a fight leh tur atan Japansese boxer inbiakna kan neihpui mek - hei erawh Mizoramah kan neih ka ring lo a, a fight tur hi top 30 huang chhung a ni tawh dawn a, fiahna tak tak a inṭan ang," tiin Vanglaini a hrilh.
NT-a strength & conditiong coach Lalbiakzuala Khenglawt chuan, "A diet plan engkim kan tih ang chu 100% in a zawm vek a, a ti ṭha em a, NT-a hi chuan hlawhtlin a phu a ni," tiin a boxer enkawl chu khawvel huap pawha top level thlenga tura a beisei thu Vanglaini a hrilh.