Arsenal laipui puak leh ta

An match hnuhnung berah Arsenal an che fuh lo a, an chak loh hnu an match khelh leh hmasak berah erawh laipui a puak leh ta. Gunners hian an mikhual Newcastle United chu 2-0 in an hneh.

Inrinni zan Emirates Stadium-a Premier League inkhelah Mikel Arteta nauten ball an chang tam a, goal hmaah erawh an vannei mai lo. Captain Pierre-Emerick Aubameyang chuan hnai zet aṭangin goal ban a pet per.

Jonjo Shelvey-a long shot ṭha zet pawh keeper Aaron Ramsdale-a'n a lo nam per hman hram a, goal bar a per hlauh. Chawlhlawk hmain goal a lut lo a, mualneitu Arsenal lamin ball an chang hnem satliah.

Second half-ah erawh Bukayo Saka-a'n Nuno Tavares siamsak a khung a, goal hmasa khungtu Saka thlaktu Gabriel Martinelli-a'n khelmual a luh aṭanga a ball khawih hmasaah goal mawi khung nghalin North London club a chakpui.

Saka a thlak chhan sawiin Arteta chuan, "A awm a nuam lo deuh, 100% a nih loh chuan thil eng emaw tih a ngai," a ti a, hliam na tak a nih erawh a rin loh thu a sawi tel bawk. Gunners hian an match lehpekah Manchester United an hmachhawn dawn.

Gunners-in match 13 khelh aṭanga point 23 hmuin table-ah pangana an ni a, season bul ṭan chhe mah se an insiamṭhat hnuah an kang chak hle. Premier League mawngphah team laka an tlawm ngai loh record chu an chhawm nung zel.

Chak lo Newcastle tan erawh ngaihtuah tur a tam dawn. Magpies hian neitu thar nei mah se sum an la hmang thei ngawt bik lo a, team 20 zinga chak ni hmel la hmu lo awmchhun an ni - inhamtan an duh a nih chuan January barzarah player an lei nual a ngai ang.