Undercard : Mizo 5 chak, 1 chak lo

LPS Fight Night 2-ah fight night hmasa ber aiin undercard a hmuhnawm zawk a, Mizo boxer paruk inlan aṭangin pakhat chiah a chak lo.

H. Lalrinhlua'n professional fight a hmachhawn hmasak berah Subin Augustine chu unanimous decision hmangin a hneh a, round li ni loin round nga ni se chu Hnahthial tlangval hian a knockout thei hial ang.

C. Lalhruaitluanga hmaah Rajasthan boxer Kamal Kant -a'n defensive game mawi tak lantir mah se Mizo tlangval thahrui ngahna a lang. Mualpui tlangvalin boxing hmuhnawm lantirin round 4-ah TKO hmangin a chak.

Vanlalawmpuia'n thapui thawhin knockout tumin Suresh Pasham a bei nghal a, round 3-naah a tlu zawkah a ṭang. Amaherawhchu Khuangthing tlangval hi a rawn tho chhuak a, round 6-naah TKO hmangin a chak.

HC. Lalramfela'n a khingpui Parash Chauhan insiamremna hun a pe lo a, Chawngtlai tlangval hian combination ṭha tak nen chiang tak taka hnek nghalin second rei lote chhungin hnehna a chang.

Laldingliana'n Rohit Mehra lakah boxer talent nei ṭha bik a nihzia a pholang a, a chevel ringawt chu hmuhnawm a tling. Tuipui boxer ṭha mi hian round khatna lekah KO-in Haryana boxer a hneh.

Co main event-a dah F. Zoramchhana leh Sandeep Singh te inhnek chu fight night 2-a bout hmuhnawm bera ngaih a ni a, boxer pahnih an fimkhur dun hle. Sandeep-a'n one-two hmanga a hnek tlang leh ṭhin avangin a dinhmun a ṭha hret a, Punjab boxer tawnhriat neih ṭhat zawkna langin majority decision (57-57, 55-59, 56-58) hmangin a chak.