Liverpool-in goal khung an thiam; Gerrard a chak

Diogo Jota-a'n goal hnih a khung a, Thiago Alcantara leh Virgil van Dijk ten goal khat ve ve an khung bawk. Liverpool goal khung thiamzia kan hmu leh ta a, Southampton lakah 4-0 in hnehna an chang.

Liverpool-in inelna hrang hrangah match 17 chhung chu a zawnin match tinah goal hnih an khung tling ta ziah a, kum 1927-a Sunderland hnua English football-a he record siam leh thei hmasa ber an ni.

Hetihlai hian Liverpool fan-te lawmna belhchhah turin an club legend leh an ngaihzawn rawn Steven Gerrard chuan Aston Villa hnehna a chanpui.

Reds fans tam takin Jurgen Klopp ban huna an coach atana an hual lawk hian Crystal Palace lakah Villa hi 2-1 in a chakpui a, coach a nihna anga Premier League-a a match hmasa pahnihah hnehna a chang ta.

A goal hma
Anfield-ah goal khung turin Liverpool-in hun an mamawh rei lo a, second 97-na lekah Jota chuan Andrew Robertson-a ball cross chu hmahruaina goal ni turin a khung - April 2019 (15 seconds vs Huddersfield) hnua Premier League-a Reds-in goal an khung ran ber ṭum a ni.

Arsenal sawp zo hlim Liverpool-in hahchawlh lam an ngaihtuah lo. Sadio Mane-a'n chance duhawm tak a tauh out a, a goal khung chu offside vangin pawmsak a ni lo bawk a, Jota bawk a inlar nawn.

Southampton lamin an defending pherh an tuar a, Mohamed Salah ball siamsak chu vengtu nei lo Jota-a'n minute 32-naah harsatna nei loin goal-ah a chantir a, chak tur a chiang titih der!

Liverpool-in goal hnih an khung hian Jurgen Klopp-a hnuaia an goal 700-na a ni a, Reds ṭantuten German coach an neih chhung chuan thlamuang takin goal khung zel an beisei thei ang.

A la tawk lo
Brighton & Hove Albion nen an inhmachhawn ṭumin Liverpool-in minute 30 pawh a tlin hmain goal hnih an khung a, chak tura ngaih an ni - mahse, si phurh an suttir a, a tawpah point khatah lungawi an zir.

Reds player-ten he thawnthu duhawm lo hi thai reh an duh. Minute 37-naah Champions League-a goal khung zo hlim Thiago Alcantara chuan Saints tlarhnungte ball petchhuah theih loh zarah an goal thumna a khung.

Second half ṭantirah Van Dijk-a'n goal khung a thiam ve tih pholangin a khung ve leh a, Saints lamin a chhanletna tur an nei lo a, khualmualah an tlawm chiang hle. Liverpool boss Klopp chuan, "Season hmasa kha chuan hliam vangin kan buai hma em em a, kan duh angin kan khel chhuak thei lo.

"Tun season erawh mumal taka pre-season nei chungin bul kan ṭan thei nghal a, kan chhawr hle. Mahse, Alisson-a'n hna a nei kha ṭha ka ti lo a, a hna neih lah hna hautak niin a hlauhawm em em - nghet taka kal zel kan duh chuan khatiang kha a thlen fo a thiang lo a, match tinah goal hnih kan khung reng dawn lo," a ti a, tlarhnung insiamṭhat an mamawh thu a sawi.

A hming Gerrard
Player a nih lai pawha hruaitu ṭha a nih avanga fak hlawh tak Gerrard-a'n top club coach ni turin theihna a nei tih a pholang leh ta a, player a nih laia a elpui Patrick Vieira enkawl nghet tawh sa Crystal Palace lakah Villa chu 2-1 in a chakpui.

Villa tan Matt Targett leh John McGinn ten goal khat ve ve an khung a, an goal khung a chhang khat hle - Targett-a'n goal a khung hian minute 15-na a ni a, McGinn-a'n a khung ve meuh hian minute 86-na a ni tawh.

Palace tan Marc Guehi chuan hun pek belhah goal khat rawn khung ve leh mah se a team fuih phur turin hunin a daih tawh lo a, an mikhual lakah 2-1 in an tlawm.

Gerrard chuan, "Zaninah chuan kan chak hi kan lawm a ni thei a, mahse, Manchester City kan tum zui dawn avangin naktuk aṭang chuan kan inbuatsaih lehnghal ang. Kan bul ṭan danah ka lawm a, mahse, hna tam tak thawh tur kan la nei," a ti a, Nilaini zan dar 1:45-ah Aston Villa an mikhual ang.