Italy emaw Portugal emawin World Cup khel dawn lo

Europe aṭanga World Cup khel tur zawnna playoff draw chu November 26, Zirtawpni zan khan pawh a ni a, Italy leh Portugal te chu path khatah an awm. Chumi awmzia chu Qatar-a World Cup khelh hunah European champion Azzurri emaw Cristiano Ronaldo telna Portugal emaw an inlan dawn lo tihna a ni.

Roberto Mancini hote hian semifinal-ah North Macedonia an hmachhawn ang a, hnehna an chang a nih chuan final-ah Portugal leh Italy chak zawk an hmachhawn dawn. Path aṭang hian pakhat chauh tlang theih a ni a, single leg-a khelh tur a nih avangin thiam chauh a tawk lo - vanneih a ngai tel ang.

Italian manager Mancini chuan, "Fixtures a fuh lo a, tun aia team nem zawk hmachhawn thei kan ni. Final lut turin North Macedonia hneh phawt a ngai a, Portugal hian Italy tum loh an duh zawk ngei ka ring a, keini pawhin anni pumpelh hi kan duh," tiin a sawi.

Portugal coach Fernando Santos chuan, "Italy ngaihtuah a hun lo a, Turkey hneh dan tur ngaihtuah phawt a ṭul. Chanchin lawmawm erawh final kan thleng a nih chuan kan home-ah kan khel dawn. Entu vang chauh ni loin zin a ngaih dawn loh avangin mahni muala khelh hi a ṭha a ni," tiin a sawi ve bawk.

Path A-ah Scotland vs Ukraine, Wales vs Ausria; Path B-ah Russia vs Poland; Sweden vs Czech Republic bakah Path C-ah Italy vs North Macedonia; Portugal vs Turkey te an awm. Path tin aṭang hian team khat ṭheuh Qatar pan turin an tling ang.

Europe aṭanga World Cup khel tur zawnna playoff semifinal hi March 24, 2021 (Ningani)-ah khelh a ni ang a, final hi March 29, 2021 (Thawhlehni)-ah khelh a ni thung ang.

Inter confederation playoff-a inhmachhawn tur pawh an pawt nghal a. Asia ram aṭanga playoff khel turin South America ram an hmachhawn dawn a, Qatar zin a harsat phah ang.

Oceania champion-in CONCACAF (Confederation of North, Central America and Caribbean Association Football) lam an hmachhawn thung dawn. Playoff hi June 13-14 , 2021-ah khelh a ni ang.

Path A
Scotland 1:15 AM Ukraine
Wales 1:15 AM Austria

Path B
Russia 10:30 PM Poland
Sweden 1:15 AM Czech Republic

Path C
Italy 1:15 AM North Macedonia
Portugal 1:15 AM Turkey

Semifinal hi March 24, 2021 (Ningani)-ah khelh a ni ang a, final hi March 29, 2021 (Thawhlehni)-ah khelh a ni thung ang.