Xavi hoin Barcelona an chak leh ta

Barcelona-in coach thar Xavi hoin hma an sawn zel a, club legend enkawlna hnuaia an league match hnihnaah Villarreal chu 3-1 in an hneh - league match hnih a zawnin an chak ta.

Catalan club tan Frenkie De Jong, Memphis Depay leh Philippe Coutinho (penalty) ten goal khat ṭheuh an khung a, Villarreal tana Samuel Chukwueze goal khungin awmzia a nei phak lo.

Barcelona-in hnehna an chan avangin league match 14 aṭangin point 23 an nei a, table-ah pasarihna dinhmun an luah - top four an hnaih ve zel e.

Hei le Barca
Villarreal khelmualah Barcelona-in goal an khung nghal mai lo - second half ṭan aṭanga minute thumnaah Frenkie De Jong a inlar a, Dutch midfielder hian hnai set sawt aṭangin goal hmahruai a khung.

Barca phur lutuk tur beng dai turin Chukwueze chuan minute 76-naah ṭha zetin si phurh a rawn sut a, Barca-in point thum an hawn dawn lo niin a lang hman leh tawh.

Mahse, Catalan club tan Memphis Depay chuan hun tawp nan minute hnih chiah a awm tawh tihah goal a rawn khung ve leh a, bench aṭanga luhtir Coutinho chuan hun pek belhah chak nemnghehna goal penalty hmangin a khung leh bawk.

Inenfiah a ṭul
Xavi enkawlna hnuaiah Barca an phur thar a, league match hnih a zawnin an chak. Chutihrual chuan Catalan club inkhel en tan chuan phur hluaina tur niin a lang lo a, scoreline-in result a hrilhfiah tawk lo.

Villarreal tan tlarhmaa inkawp Manu Trigueros leh Arnaut Danjuma ten an tlan chakna leh an movement mawi tak hmangin Barca tlarhnung vawi tam an rum ṭhaih a, an vanneih zan a nih loh vangin Barca an vanneiah a ngaih theih.

Yellow Submarine hi an phu angin penalty pek an ni lo bawk - first half-ah kum 24 mi Danjuma-a shot chu Gerard Pique chuan a kutin a dang a, mahse, referee-in penalty a pe duh tlat lo!