Goal nen Haaland a lo kir

Erling Braut Haaland chu Bundesliga goal 50 khung tling thei naupang ber a ni. Borussia Dortmund striker hian kum 21 leh ni 129 mi chauh ni chungin German football inelna sang berah goal 50 a khung der tawh.

Norway international striker hi hliam vangin thla khat chhung a chawl a, a lo kir lehna match hmasa berah goal a khung leh nghal. Dortmund hian an mikhualna ramah VfL Wolfsburg chu 3-1 in an luhchhuuah a ni.

Wolfsburg tana Wout Weghorst goal hmahruai chu Emre Can-a'n penalty aṭangin a sut a, forward Donyell Malen-a'n an hmahruai a khung bakah, bench aṭanga lut Haaland-a'n chak nemngheh nan a khung bawk.

Bundesliga table-ah Dortmund hian champion lai Bayern Munich an tlan pel zuai. Mahse, Bavarians hian Leroy Sane goal hmangin Arminia Bielefeld 1-0 a hnehin a chung berah an inhlangkai lehnghal.

Bayern hian hnehna an chang a ni saltiah lo, kum 2021 chhungin Bundesliga bikah goal 102 zet an khung tling ta a, tun hma lama Cologne (1977) a record an lo siam tawh goal 101 chu an khum - thlasik chawlh hmain league match nga ngawt khelh tur an la nei.

Bundesliga hma-hruaitu Bayern leh an hnuai chiaha awm Dortmund te hi December 4, Inrinni zanah an inhmachhawn zui dawn a, tun dinhmuna an intlauhna hi point khat lek a nih avangin match pawimawh a ni dawn.