A vawi nga nan Juventus chak lo

Serie A season kal laiah match 14 chauh an la khel, heng zinga match nga zetah Juventus chu an tlawm tawh. Inrinni zan khan Old Lady hi an mikhual Atalanta lakah 1-0 in an tlawm a, goal awmchhun hi minute 28-naa Duvan Zapata khung a ni.

Allianz Stadium-a inkhel ni mah se Juventus lamin goal hlauhawm an nei hleithei lo. Goal an phurh hnuah pawh hma an sawn hleithei lo, hun tawp dawn lamah Paulo Dybala-a'n freekick aṭanga bar a pet per bak sawi tur an nei tam lo.

Goal khung harsat
Cristiano Ronaldo a chhuah hnuah hnuah tlarhma lama rinrawl tur an lalut lo a, an neih sa Dybala leh Alvaro Morata te an inhliam fo bakah an hriam tawk lo - Turin club lian hian goal khung an harsat takzet.

Massimiliano Allegri naute hian Serie A match 14 aṭangin goal 18 chauh an khung a, table-a a sang zual 10 zinga goal khung tlem ber an ni. Champions League lamah Chelsea laka mualpho hlim an ni bawk.

Allegri chuan, "Goal khung harsat tlat ṭum kan nei ṭhin. Tun hnaiah pawh Lazio, Fiorentina leh AC Milan lakah goal khung kan harsat, kan buaina hi kan chingfel a nih chuan inrintawkna nen kan kal thei tawh ang.

"Atalanta khan kan tihsual vangin target zawnah vawi khat chiah an pet a, vanduai thlak takin a goal. Kan tan vanneihna ni a inherchhuah ngei ka beisei," a ti a, a sang zual 10 zingah chuan an tel phak ngei a beisei thu a sawi bawk.

Inter an chak
Inkhel dangah Inter Milan chuan Hakan Calhanoglu leh Lautaro Martinez te goal hmangin kai thar Venezia chu 2-0 in an luhchhuah a, league nomawi an kawl lai chu awlsam taka hloh mai an tum lo - humhim theih ngei an la beisei sang hle.

Nerazzurri hian hliam vangin Alexis Sanchez, Arturo Vidal, Stefan de Vrij leh Aleksandar Kolarov te an chhawr thei lo. Player tawnhriat nei ṭha ṭhenkhat inlan lo mah se an buai phah lem lo, manager thar Simone Inzaghi nauten point thum hlu tak an hlawh chhuak.

Inter tana goal hnuhnung zawk khungtu Martinez chuan, "Pier Luigi Penzo Stadium-ah hian ka inkhelh vawi khatna a ni a, ruah a la sur zui. Inkhel awlsam chu a ni hran lo, a chang chuan vannei deuh taka hnehna kan chan chang a awm ve ṭhin.

"Ka hma hun chungchang zawhna ka dawng fo a, thil mak niah ka ngai hran lo. Kei chuan Inter Milan player ṭha tak a ni, tih hi min min hriat dan ni se ka duh," tiin a sawi a, Italian club chu chhuahsan mai a tum lem lo.