Barcelona an chak nghal - Messi bawk a hmuhnawm

Spanish La Liga-ah  Barcelona an inlan ve leh ta a, kan thil hmuh chu a ngai bawk a ni. Catalan club an chak a, Lionel Messi chuan goal a khung bawk. 

Catalan club hian Covid-19 vanga league chawlh lailawk a nih hnua an match hmasa berah Mallorca chu 4-0 in an sawp a, La Liga-ah hma an hruai chhunzawm zel. 

Barcelona elpui ber Real Madrid chu nizan khan an inlan ve chauh a, Eibar mikhualin he thu buatsaih lai hian result kan hre hman lo. Real hi chak pawh ni se table chung bera Barca dinhmun erawh tih danglam phak a ni lo ang. 

Zirtawpni zan khan Champions League khelh beisei Getafe leh Valencia an inlan a, hnehna an chang zo lo ve ve - season thara European club football inelna sang ber khel turin an dinhmun a khirh ta hle.

 

Mallorca khelmualah goal khung turin Barcelona-in an nghah rei a ngai lo. Minute hnihna lekah Arturo Vidal  chuan goal hmasa ber a khung a, team pahnih 'quality' enin chak tur a hriatthiam theih nghal.

Minute 37-naah Barca-in an goal hnihna an khung leh a, goal khungtu hi Martin Braithwaite a ni. Denmark international striker hian Barca tan a vawi khat nan goal a khung a, Allan Simonsen leh Michael Laudrup hnua Danish player zinga Barca tana goal khung leh hmasa ber a ni. 

Kum 29 mi lai  ni tawh mah se Braithwaite hming hi i la hre tam lo a nih pawhin kan dem lo che - February 2020 khan Ousmane Dembele hliam vangin Barca hi player dang an lakluh phalsak an ni a, Braithwaite hi euro maktaduai 18-in kum li leh a chanve atan an lalut. 

Middlesbrough tana Championship a khelh lai pawha striker langsar ni phak lemlo hian tun season-ah Leganes tan bul ṭanin inelna hrang hrangah match 27 khelin goal riat a khungsak a, tunah erawh league nomawi chawi mai thei dinhmuna dingin Barca tan goal a khung ta hial.

Barca-in Braithwaite an lei theih chhan kha season tawp thleng daih tura Dembele inhliam vang a ni a, chutihrual chuan Danish striker an lakluh chhan tak erawh season tluan atana Luis Suarez inhliam zui ve leh vang a ni. 

Suarez thlak tura an lakluh striker-in goal a khung a, striker thiam bik ke aṭanga chhuak a ni - hei mai hi a ni lo, Mallorca goalkeeper Manolo Reina chuan a goal hnihna ni ngei tura ngaih chu ṭha zetin a lo dansak bawk. 

Braithwaite-a'n Suarez-a 'class' a phak lo tih chiang mah se a pawimawh ber goal a khung miau avangin Barca fans an lawm ang tih a chiang a, an lawmna belhchhah turin Suarez a dam tawh bawk. 

January-a a khup ding lama zai tawk Uruguayan striker hi minute 57-naah luhtir a ni a, kum 33 mi striker hian a thiam a la theihnghilh hman lo tih pholangin khelmualah a hlauhawm tluan chhuak zak!

Barcelona chak thu ziah chuan Messi goal khung thu ziah tel a ngai ṭhin. Minute 79-naa Jordi Alba-a'n an goal thumna a khung hnuah Messi a inlar ve a, hun pek belh minute thumnaah an goal lina a khung. 

Messi hian tun season La Liga-ah goal 20 a khung tling leh der tawh a, La Liga-a a season hnuhnung 12-ah goal 20 a la khung tling ziah - season 12 chhung La Liga-a a zawna goal 20 khung ziah thei record thar a siam!

Argentine striker hian goal a khung a ni satliah lo - Braithwaite leh Alba goal khung tur a siamsak a, tun season-a league match 23-a khelhah goal 20 khungin assist vawi 14 a nei tling leh der tawh. 

Messi goal khung hi Luis Suarez siamsak a ni a, Barca fan-te chuan hei hi hmuh nuam an ti khawp ang - striker pahnih hi an dam ṭhat phawt chuan Barca tlarhma chu an ngaihtuahawm loh ang.

 

Tlarhnung phui ṭhat vanga fak hlawh Getafe-in Covid-19 hnuah an tlarhnung an venghim tawk lo a, Granada lakah 2-1 in an tlawm. Season thara Champions League khelh tum team hi an dinhmun a him ta lo hle. 

Granada mualah Getafe hian minute 20 chhung lekin David Timor hmangin goal hmahruai an khung nghal a, an tlarhnung a phui ṭhin avangin chak mai tura ngaih an ni. 

Mahse, season thara European football khelh tum ve tho Granada-in an tha an thlah duh bik lo. Carlos Fernández chuan goal hnih a rawn khung a, hun tawp thlenga goal dang lut loin Granada 2-1 in an chak. 

Valencia-in Levante lakah minute 89-naa Rodrigo goal khung an chakpui dawn niin inngai mah se hun pek belh minute riatnaah Gonzalo Melero chuan penalty hmangin si phurh a rawn sut a, minute 74-naah Roger Marti hnawhchhuah ni mah se Levante-in tlem zawk an nihna chu an innghawng tir lo.