Brazil hmaah Belgium golden generation
Belgium squad hi World Cup-a an ṭhat ber ṭum anga ngaih an ni a, 'golden generation' tih hialin koh an ni.
Major tournament nomawi la chawi ngai lo team hi Russia-ah meuh pawh champion thei tura beisei an ni a, rin lawk ang ngeiin quarterfinal an lut–zanin dar 11:30-a an hmaa ding tur erawh Brazil an ni a, final kalkawng a harsa dawn.
Belgium coach Roberto Martinez chuan, "World Cup-a Brazil hmachhawn hi naupan lai aṭang tawha player-te duhthusam a ni a, nuam ti takin an khel ang," a ti a, World Cup-a vawi nga champion tawh team a hlau bik lo.
Neymar chhantu
Brazil tan ṭum dang ang bawkin Neymar chu player ṭangkai a ni leh dawn tih a chiang a, Belgium tlarhnung tan Paris Saint-Germain forward ven uluk a ṭul ang.
Round of 16-a Mexico laka goal khat khunga assist nei bawk forward hian Russia-ah ber nihna a nei leh nual tawh–shot ngah ber (23), target-a shot hnem ber (12), chance ngah ber (16) leh dribble ngah ber (40) a ni vek a, zaninah pawh hnawksak tura beisei a ni.
Mahse, Neymar hian tluk der chin avangin sawisel a hlawh a, hei hian pressure a pek belhchhah hlau an tam. Mahse, pound maktaduai 200 man forward hian chhantu a nei hrawl a, ram legend Rivaldo leh Ronaldo an ni.
World Cup 2002-a goal riat khungtu Ronaldo chuan, "Neymar sawiselna hi engmah lo mai a ni a, referee-ten an chhan tawk lo a ni," a ti a, Rivaldo chuan, "Heng sawiselna zawng zawng hi theihnghilh la, football mawina chu min hmuhtir leh rawh," tiin a fuih ve bawk.
Martinez a fimkhur
Belgium-in Japan lakah si hnih an phur hmasa a, vannei takin 3-2 in an lehthal. Red Devils boss Martinez-a'n eng team lakah pawh chetsual theih a ni tih a chiang tawh a, Brazil laka fimkhur ṭul zia phei chu a hrechiang lehzual.
Everton coach hlui chuan, "Brazil kan hmachhawn a nih chuan he inelnaa team ṭha ber hi kan hmachhawn tih kan hre tur a ni. Neymar leh Philippe Coutinho te hi second tlemte chhunga inkhel thlak danglam thei an ni a, anni dan chah dan hi kan ngaihtuah a ṭul ang," a ti.
Martinez-a'n Brazil ṭhatzia a sawi rualin a squad en hmaih bik a thiang lo–Brazil hneh tura team ṭha tawk an awm a nih chuan he Belgium team hi an ni ang.
Belgium 'golden generation' hian match 23 chu tlawm hmel an hmu tawh lo. Russia-ah Uruguay nen an match hmasa palia chak vek thei awmchhun an ni a, he match pali-ah hian goal 12 an khung tawh.
In thlak danglamna
Brazil tan player pawimawh Casemiro chuan Mexico lakah a yellow card pahnihna a hmuh avangin a inlan thei dawn lo a, Real Madrid midfielder awm loh hlan hian Fernandinho chu inkhel bul ṭan tura beisei a ni.
Selecao tan chanchin lawmawm erawh a awm tho a, hliam vanga Mexico hmachhawn thei lo pahnih Marcelo leh Douglas Costa ten nimin khan training an zawm leh tawh.
Belgium lamah hrem vanga inlan thei lo an awm dawn lo. Hetihlai hian first XI erawh an thlak danglam dawn nia sawi a awm a, Yannick Carrasco aiah Japan laka goal khungtu Nacer Chadli chu luhtir a nih a rinawm.
Red Devils tan hliam vanga tournament tir lama a inlan theih loh hnuah Vincent Kompany-a'n Japan a hmachhawn leh tawh avangin zaninah pawh inkhel bul ṭan tura beisei a ni. Kompany chuan, "Player mal anga lak hran pawhin Brazil hi keini aiin an ṭha zawk a, fimkhur a ṭul dawn a ni," a ti.
3-4-3 a derthawng?
Belgium-in formation an hman thiam chu 3-4-3 a ni a, tlarhnungah Toby Alderweireld, Vincent Kompany leh Jan Vertonghen an inkawp a, Thomas Meunier leh Yannick Carrasco ten wing back angin tlarhmaa goal li khung tawh Romelu Lukaku, Dries Mertens leh Eden Hazard te inkawp an thlawp ṭhin.
Martinez-a'n attacking football a ngaina a, mahse hei tak hi zaninah erawh an buaina a ni thei. Wing back an tlanchhuah nasat avangin an tihsualah counter attack hmanga nawr let an nuam a, chutianga nawr let tur chuan Brazil hian Neymar, Gabriel Jesus, Willian leh Coutinho an nei!
Match li khelh tawhah Belgium-in goal li an chhuah tawh a, Tunisia-in goal hnih khung nan an hmang thei a nih chuan Brazil hian goal khung tur an nei ṭha tawk.
Hetihrual hian Brazil buaina erawh Japan buaina ang kha a ni thei–Belgium-in player lian nei tam lo Blue Samurai lakah ball 'kang' an vawrh chiahin Japan team an talbuai. Red Devils player san zawng chawhrual hi ft. 6 leh inch 1 a ni a, Brazil erawh ft 5 leh inch 9 a ni thung.