Uruguay dan tur Griezmann leh Mbappe

FIFA World Cup 2018-a rawlthar langsar ber Kylian Mbappe telna France chuan zanin 7:30 hian Nizhny Novgorod Stadium-ah Uruguay an hmachhawn dawn. La Celeste tlarhnung hi tun World Cup-a phui ṭha ber a ni a, Argentina lama goal li khung thei Les Bleus nen an inkhel tur hi en châkawmna belhchhahtu a ni.

1986-ah kir ila
Kum 1986 khan 'Diego' Maradona kaihhruaina hnuaiah Argentina-in FIFA World Cup nomawi an chawi a, hemi kum vek hian Uruguay-ah 'Diego' Godin a rawn piang ve bawk.

Khawvel footballer piang tawha ropui ber hiala an sawi Maradona chuan, "Journalist pakhat chuan Sergio Ramos chu khawvela ṭha ber tiin min hrilh a, kei chuan Diego Godin ṭhat zawk thu ka hrilh," tiin Uruguayan defender chu a fak hle.

Kum 32 mi Godin hi tunlai player tam tak angin social media lamah inlar tam loin khelmualah a theihna a lantir ṭhin a, boruaka ball a tauh theih bakah a chak avangin target man dah ṭhat pawh a thiam hle. Feet ruk leh inch khata sang a ni a, defender laiah chuan palian tih tur ni lo mah se a timing hriat leh awmna hmun hriat lamah player tam zawk chunga leng a nih avangin Uruguay tlarhnung khaipa tih theih a ni.

Vawi 121 zet ram tana inlan tawh Godin hi Atletico Madrid lama a kawppui Jose Gimenez nen defence laiah an ding dun a, Gimenez hi kum 23 chauh ni mah se ram tan vawi 45 zet inlan tawh a ni a. Ding lamah ram tan vawi 80 inlan tawh kum 31 mi Martin Caceres a awm a, vei lama awm Diego Laxalt-a'n ram tan vawi 9 chauh la khel mah se a goal bawh a nat avangin a hmuhnawm ber a ni lawi si.

Uruguay defence hi tawnhriat nei ṭha keeper Fernando Muslera chuan a rawn tifamkim a, tlarhnung pui tura awm Lucas Torreira a awm. Ani hi feet nga leh inches ruk leka sang ni mah se a che rang a, Portugal forward Cristiano Ronaldo pawh nek sawn thei a ni a, a thiam tih nemnghetu chu Premier League club Arsenal-in an lalut dawn.

1998-ah chuan
Tun ṭuma France manager Didier Deschamps-a captain-na hnuaiah Les Bleus-in an ramah World Cup nomawi an chawi a, hemi kum hian Kylian Mbappe chu France khaw pakhat Bondy-ah Cameroonian pa leh Algerian nu inkarah a rawn piang. Deschamps chuan, "World Cup kha en ve hman lo mah se ani a rawn piang hi kan lawm a, France khua leh tui a ni hi kan lawmna belhchhatu a ni," tiin a sawi.

Mbappe hian Argentina lakah goal hnih khungin kum 17 mi Pele-a'n kum 1958 WC-a goal hnih a khung hnua kum 20 hnuai lam player-in World Cup-a goal hnih khung leh thei hmasa ber a ni. PSG forward Mbappe chuan Pele nena khaikhin duh lo mah se khawvel player ṭha ber zinga mi a ni tih phat rual a ni lo a, Monaco tana a khelh laiin Champions League semifinal an thleng thei a, a man pawh khawvela player manto ber Neymar hnuai chiah a nih avangin World Cup hmaa khawvel pum deng chhuak tawh a ni.

France hian Euro 2016 player of the tournament Antoine Griezmann an kawl a, Atletico Madrid striker hian penalty aṭangin goal hnih khung tawhin club tana khelhpui Godin leh Gimenez te ven ṭhat a ṭul zia an hrechiang ber ang.